अहमदनगर : अर्बन बँक गेल्या काही दिवसांपासून वेगवेगळ्या कारणांवरून चर्चेत आहे. बनावट सोने तारणावरून बरेच पदाधिकारी आणि अधिकारी अडचणीत आले आहेत. आता तर नोकरी लावून देण्याचे नवीन प्रकरण समोर आलेय. नोकरभरतीतही काही गफला झाला की काय अश चर्चा सुरू झाली आहे.

अर्बन बँकेत पतीस नोकरी लावतो, म्हणून पैसे घेऊनही नोकरी लावली नाही. घेतलेल्या पैशाचा तगादा केला असता, मागासवर्गीय महिलेस जातीवाचक शिवीगाळ करुन तिचा विनयभंग केला. या आरोपावरून नगरसेवक कमलेश गांधी यांच्यासह चार जणांविरुद्ध शेवगाव पोलिस ठाण्यात जातिवाचक शिवगाळ केल्याचा व विनभंगाचा गुन्हा दाखल करण्यात आला आहे.

दरम्यान अर्बन बँकेतील शाखा व्यवस्थापक गोरक्ष शिंदे यांच्या आत्महत्येची घटना ताजी असतांनाच ही घटना उघडकीस आल्यामुळे अर्बन बँकेतील गैरव्यवहार चव्हाट्यावर आला आहे. या संदर्भात पीडित महिलेने दिलेल्या फिर्यादीत म्हटले आहे की, सन २०१३ मध्ये ललिता तापडिया व कमलेश गांधी यांनी माझ्या पतीस अर्बन बँकेत नोकरीला लावून देतो, असे म्हणून माझ्या सासूकडे १० लाखांची मागणी केली. त्यातील पाच लाख ५० हजार रुपये रोख घेतले होते. मात्र, पतीस नोकरीस लावून न दिल्याने आमच्यात वाद झाले. त्यानंतर ललिता तापडीया हिने माझ्या पतीविरुध्द धनादेश न वटल्याचा गुन्हा न्यायालयात दाखल केला.

१५ मार्च २०२१ रोजी सकाळी मी घरात एकटीच असताना कमलेश गांधी (रा. शास्त्रीनगर, शेवगाव), ललिता तापडीया, जगदीश तापडीया, शरद जोशी (तिघे रा. देशपांडेगल्ली, शेवगाव) यांनी घरी येऊन जातिवाचक शिवीगाळ केली. मारहाण केली.

दरम्यान आरोपींवर गुन्हा दाखल होत नसल्याने पीडित महिला व तिचे कुटुंबीय दोन दिवसांपासून पोलिस ठाण्यासमोर उपोषणास बसले होते. त्यामुळे शुक्रवारी (ता. ३०)रात्री उशिरा पोलिसांनी गुन्हा दाखल केला.