Lightning Stikes News: राज्यातील अनेक जिल्ह्यात अवकाळी पाऊस सुरु आहे. वादळी वाऱ्यासह सुरू असलेल्या अवकाळी पावसाचा तडाखा नागरिकांना बसला आहे. राज्यात वेगवेगळ्या घटनांमध्ये वीज कोसळल्याने चौघांचा मृत्यू झाल्याची घटना घडली आहे. अहमदनगर, परभणी आणि चंद्रपूरमध्ये वीज कोसळण्याची घटना घडली आहे. (Latest Marathi News)

अहमदनगरच्या भेडार्पूर गावात प्रमोद भाऊसाहेब दांगट (वय ४२), अलका रामदास राऊत (वय ५०) या दोघांचा मृत्यू झाला आहे. तर परभणीत १७ वर्षीय गणेश अजीराम जाहानेचा मृत्यू झाला. तर चंद्रपूरमध्ये बाबू सिंह नावाच्या कामगाराचा मृत्यू झाला आहे.

परभणीतील जिंतूर तालुक्यातील पांगरी शिवारात अचानक वीज कोसळल्याने मेंढपाळ युवकाचा जागीच मृत्यू झाला आहे. तर अन्य दोन जण गंभीर जखमी झाले तर २० च्या वर शेळ्या ठार झाल्याची घटना घडली. आज बुधवारी सायंकाळच्या सुमारास ही घटना घडली. दरम्यान जखमींवर प्राथमिक उपचार ग्रामीण रुग्णालयात जिंतूर येथे उपचार करून पुढील उपचारासाठी जिल्हा सामान्य रुग्णालयात हलवण्यात आले आहे.

शेतात अचानक वीज कोसळल्याने शेळीपालन करणारा युवक गणेश अजीराम जाहाने (वय 17 वर्ष) याच्या अंगावर वीज पडल्याने त्याचा जागीच मृत्यू झाला आहे. तर बाळू मुंजाभाऊ लोणकर (19 वर्ष रा.) चांदज ता. जिंतूर, माधव आत्माराम मांदळे( 22 वर्षे) रा. पांगरी ता. जिंतूर हे युवक गंभीर जखमी झाले आहेत.

तर चंद्रपूरमध्येही अंगावर वीज कोसळून एका व्यक्तीचा दुर्दैवी मृत्यू झाल्याची घटना घडली. वीज (lightning) कोसळल्यामुळे कोळसा खाण कामगाराचा मृत्यू झाला आहे. चंद्रपूर जिल्ह्यातल्या वकोली खाण परिसरात ही घटना घडली. बिहारचा मूळ असलेल्या बाबू सिंह यांचा या अंगावर वीज कोसळून मृत्यू झाला आहे.