पुण्यातील दौंडमधून संतापजनक बातमी समोर आली आहे. गुऱ्हाळावर मजुरी करणाऱ्या एका कुटुंबासह एकूण २७ जणांना जबरदस्तीने कामाला लावल्याचा आणि त्यांना ओलीस ठेवल्याचा धक्कादायक प्रकार घडला आहे. धक्कदायक म्हणजे या कामगारांमध्ये २ गरोदर महिलांचा समावेश असून ७ मुले ही असल्याचे वृत्त मिळाले आहे. या घटनेने परिसरात खळबळ उडाली आहे.

मिळालेल्या माहितीनुसार, दौंड तालुक्यातील राहु गावातील हिरामण गाढवे यांच्या गुऱ्हाळावर मजुरी करणाऱ्या एका कुटुंबासह एकूण २७ जणांना जबरदस्तीने कामाला लावलं. तसेच त्यांना डांबून ठेवण्यात आलं. या प्रकरणात पीडित मजुरांनी यवत पोलिस ठाण्यात तक्रार नोंदवली असून पोलिसांनी सर्व मजुरांची सुखरूप सुटका केली आहे.

फिर्यादीच्या म्हणण्यानुसार, कामाचा मोबदला प्रती टन ३०० रुपये ठरवण्यात आला होता. मात्र, हिरामण गाढवे यांच्याकडे मजुरांनी वारंवार मागणी करूनही ते कामाचा योग्य हिशेब देत नव्हते. तसेच त्यांनी काम सोडून मजुरांना गावाबाहेर जाण्यास सक्त मनाई केली होती. कोणत्याही कारणाने, अगदी नातेवाईक आजारी पडले किंवा मृत पावले तरी गावाला जाण्यास गाढवे यांनी बंदी घातली होती. याविरोधात मजुरांनी जाब विचारल्यास गाढवे मजुरांना डांबून ठेवण्याच्या धमक्या देत होते.

मागील महिन्यात हिरामण गाढवे आणि अरुण गाढवे यांनी फिर्यादींच्या भाच्याला, शिवराम रघुनाथ रजपुत याला आजारी असूनही काम करत नाहीस या कारणावरून ऊसाने तसेच लाथाबुक्क्यांनी बेदम मारहाण केली. मारहाणी नंतर शिवराम याला घरात बंद करून ठेवले. त्यानंतर मजुरांना पोलिसांकडे तक्रार केल्यास खोट्या गुन्ह्यात अडकवण्याची दमदाटी करण्यात आली.

या संतापजनक घटनेची माहिती मिळताच २८ ऑक्टोबर रोजी सकाळी ९च्या सुमारास यवत पोलिस ठाण्याचे सतिश रजपुत, पोलीस हवालदार हनुमंत भगत, संदीप करे, सुनिल आव्हाड, जयंत भोसले, शुभम गुरव आणि मंगेश थोरात यांनी घटनास्थळी धाव घेत सर्व मजुरांची सुटका केली. ही संपूर्ण कारवाई जिल्हाधिकारी जितेंद्र डुडी यांच्या मार्गदर्शनाखाली पार पडली. या मजुरांमध्ये जाधव, माळी, रजपुत आणि बरडे या कुटुंबांतील पुरुष, महिला आणि लहान मुले असे २७ जणांचा समावेश होता. या २७ जणांमध्ये दोन गरोदर महिलांचा समावेश होता.

या घटनेनंतर यवत पोलिसांनी गुऱ्हाळा मालक हिरामण गणपत गाढवे आणि अरुण गणपत गाढवे यांच्याविरुद्ध कायदेशीर गुन्हा दाखल केला आहे. या घटनेचा पोलीस पुढील तपास करत आहे. या प्रकरणामुळे स्थानिक परिसरात खळबळ उडाली असून ऊसतोड मजुरांच्या शोषणाचा गंभीर मुद्दा पुन्हा एकदा अधोरेखित झाला आहे.