Sambhaji Nagar News: चेंबरमध्ये (Underground Sewer) पडून दोन तरुणांचा दुर्दैवी मृत्यू झाल्याची घटना छत्रपती संभाजीनगरमध्ये (Chhatrapati Sambhaji Nagar) घडली आहे. या घटनेत दोन तरुण गंभीर जखमी झाले आहेत. त्यांच्यावर घाटी रुग्णालयात उपचार सुरु आहेत. ही घटना नेमकी कशी घडली याची माहिती अद्याप समोर आली नाही. पोलिसांकडून याप्रकरणाचा तपास सुरु आहे.

मिळालेल्या माहितीनुसार, संभाजीनगर शहरातील गुलाब गार्डनसमोरील चेंबरमध्ये सोमवारी चार तरुण पडले. या चौघांपैकी दोन तरुणांचा दुर्दैवी मृत्यू झाला. तर जखमी झालेल्या दोन तरुणांना चेंबरबाहेर काढण्यात यश आले आहे. या दोघांची प्रकृती गंभीर असून त्यांना उपचारासाठी संभाजीनगरच्या घाटी रुग्णालयात दाखल करण्यात आले आहे.

या दुर्घटनेमध्ये अंकुश थोरात आणि रावसाहेब घोरपडे या तरुणांचा मृत्यू झाला. तर विष्णू उगले आणि आणखी एक तरुण गंभीर जखमी झाला आहे. या दोन्ही तरुणांना चेंबरबाहेर काढून घाटी रुग्णालयात उपचारासाठी दाखल करण्यात आले.

यामधील विष्णू उगलेची प्रकृती चिंताजनक आहे. त्यांच्यावर घाटी रुग्णालयातल्या मेडीसिन विभागात आयसीयूमध्ये उपचार सुरू आहेत. हे तरुण चेंबरमध्ये कसे पडले याची माहिती समोर आली नाही. दरम्यान, संभाजीनगर पोलिस या घटनेचा तपास करत आहेत.