नाशिक जिल्ह्यात मुसळधार पाऊस कोसळतोय. त्यामुळे अनेक नद्या दुथडी भरून वाहत आहेत. मालेगावच्या गिरणा नदीलाही पूर आलाय. यात पुरात 15 मच्छिमार अडकून पडले होते. अखेर लष्कराच्या मदतीने त्यांची सुटका झाली.

मालेगाव आणि धुळ्यातले 15 मासेमार गिरणा नदीपात्रात मासे पकडण्यासाठी उतरले होते. मात्र, काही वेळातच पाणी पातळी वाढली त्यामुळे हे तरुण तिथेच अडकून पडले होते.

माहिती मिळताच मालेगाव महापालिकेचं अग्निशामक दल घटनास्थळी पोहोचलं. मात्र, अडकलेल्यांपैकी अनेकांना पोहोता येत नव्हतं. त्यामुळे बचाव मोहिमेला यश येईना. अशातच रात्र गेली. संपूर्ण रात्र हे तरुण जीव मुठीत धरून नदीपात्रातल्या एका खडकावर बसून होते.

सकाळी NDRF ला पाचारण करण्यात आलं. मात्र, पाण्याचा प्रवाह खूप जास्त असल्याने त्यांनाही अपयश आलं. अखेर लष्कराची मदत घेण्याचं ठरलं. जिल्हा आपत्ती व्यवस्थापनाशी संपर्क करून वायुसेनेच्या हेलिकॉप्टरला बोलवण्यात आलं. या हेलिकॉप्टरने 3 फेऱ्यांमध्ये सर्व तरुणांना सुखरूप बाहेर काढलं.

मुसळधार पावसात किंवा पुरस्थितीत नदीपात्राजवळ जाऊ नये असं वारंवार आवाहन केलं जातं तरीही अनेकजण धाडस करतात. मात्र अनेकदा हे साहस अंगलट येत. मालेगावच्या तरुणांना मासेमारीची हौस अडचणीत आणली. मात्र वेळीच मदत मिळाल्यानं त्यांची सुटका झाली. यातून सगळ्यांनीच धडा घ्यायला हवा.