मुंबई - महाराष्ट्रात सत्तांतर झाल्यानंतर अनेक नेत्यांनी ठाकरे गटाला रामराम ठोकत शिंदे गटात प्रवेश केला आणि त्यानंतर राज्यात फोडाफोडीच राजकारण सुरू झालं. अशातच चंद्रकांत खैरे यांनी काँग्रेसमधील 22 आमदार हे देवेंद्र फडणवीस (Devendra Fadnavis) यांच्या संपर्कात असल्याचा दावा केला त्यानंतर राजकीय वर्तुळात उलटसुलट चर्चांना उधाण आले आहे. त्यानंतर आता महाविकास आघाडीतील 12 ते 13 लोकं शिंदे-फडणवीस यांच्या संपर्कात असल्याचा मोठा गौप्यस्फोटच उद्योगमंत्री उदय सामंत (Uday Samant) यांनी केला आहे.

तसेच राज्यात मध्यावधी निवडणूक लागण्याची कोणतीही शक्यता नाही असे उदय सामंत यांनी पत्रकार परिषद घेत स्पष्टपणे सांगितले आहे. पत्रकार परिषद बोलताना उदय सामंत यांनी मध्यावधी निवडणूक लागण्याची कोणतीही शक्यता नाही, उलट महाविकास आघाडीमधील 12 ते 13 लोकं शिंदे-फडणवीस यांच्या संपर्कात असल्याचा दावा केला आहे. 170 हा आकडा भाजप आणि शिंदे यांच्याकडे आहे.असा दावाच सामंत यांनी केला.

महाविकास आघडीत काय आलबेल आहे ते आज पुढे आले. सध्या लोकांचे लक्ष विचलित करण्याचा प्रयत्न सुरू आहे. मी राष्ट्रवादी सोडून शिवसेनेत आलो त्यावेळी खोके घेतले होते का? असा उलट प्रश्नही उदय सामंत यांनी यावेळी केला आहे.

राज्यात मध्यावधी निवडणुकांची शक्यता, उद्धव ठाकरेंचे भाकित

राज्यात शिंदे-फडणवीस सरकार आल्यानंतर आता पुन्हा राज्यात मध्यावधी निवडणुका लागण्याची शक्यता वर्तवण्यात येत आहे. उद्धव ठाकरे यांनी राज्यात लवकरच मध्यावधी निवडणुका होणार असल्याचं भाकीत वर्तवलं आहे. तसेच मध्यावधी निवडणुकांसाठी कामाला लागण्याचे आदेश ठाकरे यांनी कार्यकर्त्यांना दिले आहेत.

उद्धव ठाकरे यांनी विधानसभा संपर्कप्रमुखांची बैठक उद्धव ठाकरेंनी (Uddhav Thackreray) बोलविली होती. या बैठकीदरम्यान उद्धव ठाकरे यांनी राज्यातील मध्यावधी निवडणुकीबाबत वक्तव्य केलं आहे. या बैठकीत कार्यकर्त्यांना मध्यावधी निवडणुकीच्या तयारीला लागण्याचे आदेश दिले आहेत.