भरत मोहोळकर, साम प्रतिनिधी

बारामतीत विधानसभा निवडणूक रंगात आलीय. बारामतीत अजित पवार विरुद्ध पुतण्या युगेंद्र पवार असा थेट संघर्ष रंगलाय. त्यापार्श्वभुमीवर अजित पवारांनी बारामती मतदारसंघात गावभेट दौऱ्याच्या माध्यमातून प्रचाराचं रणशिंग फुंकलंय. यावेळी बोलताना लोकसभेला शरद पवारांना खूश करण्यासाठी सुप्रिया सुळेंना मतदान केलं. तर आता विधानसभेला मला खूश करा, असं आवाहनच अजित पवारांनी केलंय.

विधानसभेला आपल्याला खूश करण्याचं आवाहन केल्याच्या मुद्द्यावरून विरोधकांनी दादांना बारामती सोपी राहिली नसल्याचा टोला लगावलाय. तर विधानसभेचा निकाल विरोधकांची तोंडं बंद करील, असा पलटवार भुजबळांनी व्यक्त केलाय.

लोकसभा निवडणुकीत अजित पवारांच्या पत्नी सुनेत्रा पवारांचा दारुण पराभव झाला. एवढंच नाही तर अजित पवारांच्या बारामती मतदारसंघातून सुप्रिया सुळेंना तब्बल 48 हजार मतांचं लीड मिळालं. त्यामुळे अस्वस्थ झालेले अजित पवार आता भावनिक आवाहन करताना दिसत आहेत. बारामतीकरांनी लोकसभेला अजित पवारांचे काका शरद पवारांना साथ दिली. मात्र आता विधानसभेला काका विरुद्ध पुतण्या लढत असल्याने बारामतीकर युगेंद्र पवारांच्या काकाला खूश करणार की नव्या दमाचा पुतण्या युगेंद्रला संधी देणार? याकडे लक्ष लागलंय.