सागर आव्हाड, साम प्रतिनिधी

लोकसभेप्रमाणेच अख्या राज्याचं लक्ष बारामतीकडे लागले आहे. लोकसभा निवडणुकीत ज्याप्रमाणे एकाच कुटुंबातील सदस्य आमनसामने आले होते. त्याचप्रमाणे आता विधानसभेत आता काका-पुतणे एकमेकांविरोधात दंड थोपटणार आहेत. शरद पवार गटाकडून युगेंद्र पवार हे बारामतीचे उमेदवार असणार असल्याचं निश्चित झालंय.

लोकसभा निवडणुकीच्यावेळी नणंद-भावजयमध्ये म्हणजेच सुप्रिया सुळे आणि सुनेत्रा पवार यांच्यात लढाई पाहायला मिळाली होती. या लढतीमुळे अख्या देशाचं लक्ष बारामती निवडणुकीकडे लागलं होतं. आता काका पुतणे आमनेसामने आले आहेत. विधानसभा निवडणुकीत शरद पवार गटाकडून युगेंद्र पवारांना उमेदवारी देण्यात येणार आहे. तर महायुतीकडून अजित पवार हेच उमेदवार असणार आहेत.

विधानसभा निवडणुकीत अजित पवार आपल्या पारंपारिक मतदारसंघ असलेल्या बारामती विधानसभेतूनच लढणार यावर आता जवळ जवळ शिक्कामोर्तब झाले आहे. दरम्यान अजित पवार बारामतीतून लढणार की शिरूरमधून अशा चर्चा देखील सुरू होत्या. लोकसभेप्रमाणे आता विधानसभा निवडणुकीमध्ये बारामती मतदारसंघामध्ये पवारविरूध्द पवार अशी लढत होण्याची शक्यता असल्याचं म्हटलं जात आहे. अजित पवार बारामतीतून निवडणूक लढवणार नाही अशा चर्चा सरू होत्या. त्या चर्चांवर प्रफुल पटेलांनी पडदा टाकला आणि अजित पवार हे बारामतीमधूनच निवडणूक लढवणार असल्याची घोषणा केली.