Maharashtra Election : उमेदवारी अर्ज मागे घेण्याचा आज शेवटचा दिवस, बंडखोरांनी अनेक ठिकाणावरुन उमेदवारी अर्ज मागे घेतला. पण उमेदवारी अर्ज मागे घेण्यावरुन लातूरमधील औसा येथे राडा झालाय. ठाकरे गट आणि वंचित यांच्यामध्ये हाणामारीची घटना घडली आहे. पोलिसांसमोरच दोन गटामध्ये तुंबळ हाणामारी झाली. याचा प्रसंगाचा व्हिडीओ समोर आलाय. औसा विधानसभेत संतोष सोमवंशी यांनी शिवसेना ठाकरे गटाकडून बंडखोरी करत वंचितकडून उमेदवारी अर्ज दाखल केला होता. मात्र आज अचानक उमेदवारी अर्ज त्यांनी माघारी घेतला. त्यामुळे वंचितचे कार्यकर्ते आणि शिवसेनेच्या कार्यकर्त्यांमध्ये जोरदार राडा झाला.

लातूरच्या औसा विधानसभा मतदारसंघातून संतोष सोमवंशी यांनी ठाकरे यांच्या शिवसेनेतून बंडखोरी केली. संतोष सोमवंशी यांनी वंचितकडून उमेदवारी अर्ज भरला होता. पण संतोष सोमवंशी यांनी आज आपला उमेदवारी अर्ज माघारी घेतला आहे. ठाकरे गटाच्या उपनेत्या सुषमा अंधारे यांच्या मध्यस्थीने संतोष सोमवंशी यांनी उमेदवारी अर्ज माघारी घेतला आहे. तर औसा विधानसभेत ठाकरे गटाचे उमेदवार दिनकर माने यांना संतोष सोमवंशी यांनी जाहीर पाठिंबा दिला आहे. पण उमेदवारी माघारी घेतल्यानंतर ठाकरे आणि वंचितचे कार्यकर्ते भिडले. पोलिसांसमोर हाणामारी झाली.

संतोष सोमवंशी यांनी कधीही शिवसेनेच्या विरोधात कुठलही काम केलेलं नाही. ते कायम शिवसेनेशी एकनिष्ठ राहिलेले कार्यकर्ते आहेत. अशा सगळ्या परिस्थितीमध्ये हा देखील एक राजकीय भागच असू शकतो. राजकारण फक्त अभिमन्यू पवारांनाच येतं आणि ते शिवसेनेला येत नाही, असं काही समजायचं कारण नाही. संतोष सोमवंशी यांची प्रत्येक कृती ही दिनकर माने यांच्यासाठीच होती. अशा प्रकारची प्रतिक्रिया ठाकरे गटाच्या उपनेता सुषमा अंधारे यांनी माध्यमांशी बोलताना दिली आहे. दुसरीकडे वंचितकडून उमेदवारी अर्ज दाखल करुन अचानक माघार घेतल्याने वंचितचे कार्यकर्ते देखील आक्रमक झाले. यावेळी वंचितचे कार्यकर्त्यांमध्ये आणि शिवसेनेच्या कार्यकर्त्यांमध्ये राडा झाला.