Vadgaon Sheri Assembly constituency: अजित पवार यांनी सात उमेदवारांची दुसरी यादी आज जारी केली. त्यानंतर वडगाव शेरी येथील सस्पेन्स संपला. वडगाव शेरी मतदारसंघ महायुतीमध्ये अजित पवार यांच्याकडे गेला आहे. त्यांनी याजागेवर सुनील टिंगरे यांना उमेदवारी दिली आहे. पण वडगाव शेरीमधील तिढा सुटलेला नाही. भाजपचे नाराज जगदीश मुळीक यांना अद्याप उमेदवारीची आशा आहे. त्यांनी साम टीव्हीशी बोलताना याबाबत दावा केला.

वडगाव शेरीची जागा घोषित झाल्यानंतर महायुतीत सस्पेन्स कायम आहे. वडगाव शेरीची जागा राष्ट्रवादीने घोषित केले असले तरी अजून विषय संपलेला नाही, असे वक्तव्य जगदीश मुळीक यांनी केले आहे. कार्यकर्त्यांची इच्छा आहे त्यामुळे भारतीय जनता पक्ष ही जागा लढणारच, असा विश्वास त्यांनी व्यक्त केला.

अर्ज भरायला अजून तीन ते चार दिवसांचा कालावधी बाकी आहे. त्यामुळे पक्ष नेतृत्व आम्हाला न्याय देईल, असेही मुळीक म्हणाले. दरम्यान, विधानसभा निवडणुका जाहीर झाल्यानंतर महायुतीमध्ये वडगाव शेरी मतदारसंघ कुणाला जाणार? याची जोरदार चर्चा सुरु होती. अखेर हा मतदारसंघ अजित पवार यांच्या राष्ट्रवादीला मिळाला आहे. त्यामुळे भाजपमधील अंतर्गत नाराजी समोर आली आहे.