राज्यात विधानसभा निवडणुकीचा प्रचार शिगेला पोचलाय. लोकसभेला महायुतीची पिछेहाट झाल्यानं भाजपचं हायकमांड सर्तक झालं आहे. पंतप्रधान मोदी, अमित शाहांच्या तोफा धडाडू लागल्या आहेत. भाजपची मातृसंस्था राष्ट्रीय स्वयंसेवक संघही मागे राहिलेला नाही. संघाने भाजपला मदतीचा हात पुढे केला आहे.

महायुतीच्या विजयाची जबाबदारी आरएसएसच्या 'स्पेशल 65' ने घेतली आहे. मविआची प्रत्येक चाल अयशस्वी करण्यासाठी रणनिती आखली जात आहे. जातीच्या आधारावर विभाजन होऊ नये, हे हिंदूंमध्ये रुजवण्याची जबाबदारी स्वयंसेवकांनी उचलली आहे. लोकसभेचा अनुभव लक्षात घेता विधानसभा निवडणुकीबाबत भाजप आणि महायुती कोणताही धोका पत्करायला तयार नाही.

सुत्रांच्या माहितीनुसार RSS ने 65 हून अधिक मित्र संघटनांच्या माध्यमातून महाराष्ट्रात 'सजग रहो' म्हणजेच 'सावधान रहा, सतर्क रहा' ही मोहीम सुरू केली आहे. त्याचा उद्देश हिंदूंना एकत्र करणे, हिंदूंमधील जातीय फूट संपवणे हा आहे. आरएसएसचे स्वयंसेवक आणि 65 हून अधिक स्वयंसेवी संस्थांकडून विभागवार बैठका घेतल्या जात आहेत.

ज्या ठिकाणी भाजपला जातीच्या आधारावर मत विभाजनामुळे नुकसान सोसावे लागले, तेथील हिंदूंना एकत्र आणण्याचा प्रयत्न आहे. चाणक्य प्रतिष्ठान, मातंग साहित्य परिषद आणि रणरागिणी सेवाभावी संस्थांचा या मोहिमेत समावेश आहे.

मोदींनी आपल्या पहिल्या सभेत 'एक है तो सेफ है' चा नवा नारा दिलाय. काँग्रेसनं हिंदूंमध्ये फूट पाडण्याचं कारस्थान सुरू केल्याचा आरोप मोदींनी केला. उत्तर प्रदेशचे मुख्यमंत्री योगी आदित्यनाथ यांनीही 'बटेंगे तो कटेंगे' असं म्हटलंय. त्यामुळेच RSS ने हिंदूंना एकत्र आणण्याचे प्रयत्न सुरु केलेत.

मराठा आरक्षणाच्या मुद्यावरुन राज्यात मराठा-ओबीसी संघर्ष सुरु आहे. मुस्लीम मतेही मविआच्या बाजूने वळली. लोकसभेत त्याचा फटका सत्ताधारी महायुतीला बसला. त्यामुळे आता हिंदू एकत्रीकरणाचं कार्ड विधानसभेला चालणार का? हे पाहणं महत्वाचं आहे.