महाविकास आघाडीनं पुण्यात जोरदार शक्तीप्रदर्शन केलंय. पण ज्या उमेदवारांसाठी प्रचार सभा होती ते उमेदवार स्टेजवर न बसता खाली जमिनीवर जाऊन बसले. त्यामुळे विविध चर्चा सुरू झाल्यात. सुप्रिया सुळे, अमोल कोल्हे आणि रविंद्र धंगेकरांनी नेमकं असं का केलं. पाहुयात, या रिपोर्टमधून.

लोकसभा निवडणुकीचा प्रचार शिगेला पोहोचलाय. महायुतीसह महाविकास आघाडीकडून जोरदार शक्तीप्रदर्शन केलं जातंय. पुण्यात मविआचे उमेदवार अमोल कोल्हे, सुप्रिया सुळे आणि रवींद्र धंगेकर यांनी आपला उमेदवारी अर्ज दाखल केलाय. अशा कार्यक्रमात उमेदवारांसाठी व्यासपीठावर आसनाची खास व्यवस्था असते. मात्र पुण्यातील मविआच्या सभेत वेगळंच चित्र पाहायला मिळालं.

पाहिलंत सुप्रिया सुळे, अमोल कोल्हे आणि रविंद्र धंगेकर कसे स्टेजसमोर बसलेत. खरं तर हे तिन्ही उमेदवार स्टेजवर असायला हवे होते. मात्र स्टेजसमोरील रस्त्यावर बसून त्यांनी सर्वांनाच आश्चर्याचा धक्का दिला. अर्थात त्यामागचं कारणही तसंच होतं. महाविकास आघाडीच्या सभेला जी जागा देण्यात आली तीच मुळी लहान होती. स्टेज छोटं असल्यामुळे उमेदवारांनी बसायचं कुठे हा प्रश्न निर्माण झाला, मग काय या उमेदवारांनी थेट स्टेजसमोरच ठाण मांडलं आणि मतदारांच्या मनात आपली छबी उमटवण्याचा प्रयत्न केला.

निवडणूक प्रचारासाठी उमेदवार वेगवेगळ्या नामी शक्कल लढवतात. मतदारांना आकर्षित करण्यासाठी काही स्टंटही केले जातात. आता जमिनीवर बसून आपणही जमिनीवरचे कार्यकर्ते असल्याचा सिम्बॉलिक प्रयत्न मविआनं केला तर नाही ना, असाही प्रश्न आहे. मात्र या जमिनीवरच्या नेत्यांना लोकसभेत स्थान मिळणार की जमिनीवरच बसवलं जाणार, हे आता पुण्यातली जनताच ठरवेल.