आता AI ज्याच्या मदतीने हृदयविकाराचा धोका फक्त दोन मिनिटांत ओळखता येणार आहे. डॉक्टर ओपीडीमध्ये येणाऱ्या रुग्णांना हृदयविकाराचा धोका किती आहे हे आधीच सांगू शकणार आहे. शनिवारी, मुंबईतील एका खाजगी रुग्णालयात महाराष्ट्रातील पहिलं एआय-सक्षम हृदयविकार प्रतिबंधक मॉडेल लाँच करण्यात आलं.

लवकरच सरकारी रुग्णालयांमध्येही सुरू होणार

एआयचे संस्थापक नमन गोसालिया यांनी सांगितलं की, लवकरच सरकारी रुग्णालयांमध्ये हे सुरू केले जाणार आहे. हा अभ्यास २०३५ लोकांवर करण्यात आला. त्यापैकी ६२ टक्के लोक हृदयरोगाच्या उच्च जोखीम श्रेणीत, ३ ते ५ टक्के लोक कमी जोखीम श्रेणीत आणि उर्वरित लोक मध्यम जोखीम श्रेणीत आढळले. तर या लोकांमध्ये आजाराची लक्षणं नव्हती.

हृदयाच्या आजारांचा धोका ओळखणं आता सोपं

ज्येष्ठ हृदयरोगतज्ज्ञ डॉ. अजित देसाई म्हणाले की, हृदयरोग लाखो भारतीयांना प्रभावित करतो आणि बहुतेकदा त्याचे निदान उशिरा होते. म्हणूनच वेळेवर प्रतिबंध करण्यासाठी पुढाकार घेत, जसलोक रुग्णालय अँड रिसर्च सेंटरने भारतातील पहिले एआय-आधारित डॉक्टर असिस्टंट अँजाइना एक्स एआय लाँच केलं आहे. यातून रुग्णाचा धोका ओळखणं सोपं होणार आहे.

सर्वसामान्यांच्या खिशाला परवडणार

हृदयरोगाचा धोका काही मिनिटांतच मोजता येतो, तोही लक्षणे दिसण्यापूर्वी. लोक फक्त १०८ रुपयांच्या शुल्कात ही एआय चाचणी करू शकणार आहे. पद्मभूषण आणि रुग्णालयाच्या कार्डिओलॉजी विभागाचे संचालक डॉ. अश्विन बी. मेहता यांनी सांगितलं की, प्रगत एआयच्या मदतीने आपण नुकसान सुरू होण्यापूर्वीच जोखीम मूल्यांकन करू शकतो.