पचनक्रियेशी संबंधित असलेला अवयव म्हणजे पॅन्क्रिया. याला मराठीमध्ये स्वादुपिंड असं म्हणतात. पोटामागे असलेल्या या अवयवाचं नाव क्वचितच ऐकायला मिळतं, पण एकदा ते बिघडायला लागलं की त्याचे परिणाम गंभीर असतात. स्वादुपिंडाचा कॅन्सर फारच गुपचूपपणे शरीरात पाय तयार होतो. ज्यावेळी याचं निदान होतं तेव्हा तो अनेकदा पुढच्या टप्प्यावर पोहोचलेला असतो.

मात्र कोणत्याही समस्येसोबत शरीर वेळोवेळी काही सूक्ष्म इशारे देत असतं. फक्त त्याकडे बारकाईने बघण्याची गरज आहे. डॉक्टरांच्या मते, शरीर जर असे काही इशारे देत असेल तर वेळ न घालवता तपासणी करणं गरजेचं आहे.

कोणत्याही कारणाशिवाय वजन घटणं

जर डाएट, एक्सरसाइज काहीही न करता अचानक वजन झपाट्याने कमी होतंय तर ते नक्कीच चिंता करण्यासारखं आहे. पॅन्क्रिआस कॅन्सरमुळे शरीर अन्नातील पोषण द्रव्यं नीट शोषून घेऊ शकत नाही आणि त्यामुळे वजन कमी होतं.

पोटात किंवा पाठीला दुखणं

स्वादुपिंडाचा कॅन्सर असल्यास अनेकांना वरच्या पोटात किंवा पाठीच्या भागात वेदना जाणवतात. हे दुखणं सौम्य असतं. कधी-कधी येतं आणि जातं, पण हळूहळू तीव्रतेने वाढू शकतं. हे दुर्लक्ष करण्यासारखं नाही.

भूक न लागणं

स्वादुपिंडाचा कॅन्सर असलेल्या व्यक्तींना भूक न लागण्याची समस्या जाणवते. यामध्ये व्यक्तीला थोडंसं खाल्यावरच पोट भरल्यासारखं वाटतं किंवा भूकच लागत नाही. कधी-कधी ट्युमरमुळे पचनक्रिया बिघडते आणि त्यामुळे असं होतं.

सतत थकवा जाणवणं

झोप पुरेशी घेऊनही जर तुम्हाला थकवा, अशक्तपणा जाणवत असेल, तर त्यामागे कॅन्सरचे टॉक्सिन्स कारणीभूत असू शकतात. यामुळे शरीराला ऊर्जा कमी मिळते. जर तुम्हाला इतर लक्षणांसोबत हा बदल दिसत असेल तर वेळीच डॉक्टरांची मदत घ्या

कावीळ

जर त्वचा किंवा डोळे पिवळे दिसायला लागले, लघवी गडद झाली आणि शौचाचा रंग फिकट झाला तर ते कावीळीचं लक्षण असतं. स्वादुपिंडावरील ट्युमर मुळे यकृतातून निघणाऱ्या पित्तामध्ये अडथळा होतो आणि त्यामुळे कावीळ होण्याचा धोका असतो.

शौचाच्या रंगामध्ये बदल होणं

जर शौच चिकट, पांढऱसर किंवा पाण्यावर तरंगणारा असेल तर ही समस्या मोठी असू शकते. तज्ज्ञांच्या म्हणण्यानुसार, हे स्वादुपिंडाच्या कॅन्सरचं लक्षण असू शकतं.

५० वर्षांनंतर डायबेटिस

जर वयाची ५० पार केल्यानंतर अचानक साखरेचा त्रास सुरू झाला, तर ही एक महत्वाची सूचना असू शकते. स्वादुपिंडाच्या कामात अडथळा आल्यामुळे इन्सुलिनची निर्मिती कमी होते आणि त्यामुळे डायबेटिस होण्याचा धोका वाढतो.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत