Famous Marathi Singer Death: मराठी भावगीत आणि सुगम संगीत विश्वातील ज्येष्ठ गायक व संगीतकार गोविंदराव पोवळे यांचे वयाच्या ९४ व्या वर्षी निधन झाले. शनिवारी मध्यरात्री त्यांनी अखेरचा श्वास घेतला. त्यांच्या निधनामुळे मराठी संगीतविश्वावर शोककळा पसरली असून, सुगम संगीताच्या सुवर्णयुगातील एक महत्त्वाचा अध्याय संपल्याची भावना व्यक्त केली जात आहे.

‘माती सांगे कुंभाराला’, ‘रात्र काळी घागर काळी’ यांसारख्या अजरामर गीतांनी गोविंदराव पोवळे यांनी रसिकांच्या मनात विशेष स्थान निर्माण केले होते. त्यांच्या आवाजातील भावपूर्णता आणि संगीताची साधी, पण मनाला भिडणारी शैली यामुळे त्यांची गाणी आजही रसिकांच्या ओठांवर कायम आहेत.

पनवेलजवळील चिरनेर गावात त्यांचा जन्म झाला होता. त्यांचे वडील त्रिंबक पोवळे हे कीर्तनकार होते, तर आई पार्वतीबाईंनाही संगीताची विशेष आवड होती. त्यामुळे संगीताचा वारसा त्यांना घरातूनच लाभला. शालेय जीवनात कविता सादर करताना त्यांच्या गायनकौशल्याची पहिली झलक शिक्षक आणि कुटुंबीयांना दिसून आली.

अवघ्या १५व्या वर्षी त्यांनी आकाशवाणीवर गायनासाठी ऑडिशन दिली आणि पहिल्याच प्रयत्नात त्यांची निवड झाली. त्या काळात आकाशवाणीवर सुगम संगीत सादर करणारे ते सर्वात तरुण गायक ठरले. ३० मार्च १९४८ रोजी त्यांचे पहिले गाणे थेट प्रसारित झाले आणि तेथून त्यांच्या संगीतप्रवासाला खरी सुरुवात झाली. पुढे अनेक दशकं त्यांनी गायक आणि संगीतकार म्हणून आकाशवाणीशी घट्ट नातं जपलं.

गोविंदराव पोवळे यांनी अनेक लोकप्रिय गाण्यांना संगीत दिले. ‘उमटली रामाची पाऊले’, ‘पैंजण हरीचे वाजती’, ‘शुभंकरोती कल्याणम’ आणि ‘कामधाम संसार विसरुनी’ यांसारखी गाणी आजही मराठी संगीत रसिकांच्या स्मरणात आहेत. त्यांनी शंभराहून अधिक गाणी संगीतबद्ध केली होती. तसेच १९५७ मध्ये गिरगावमध्ये सुगम संगीताचे वर्ग सुरू करून अनेक नवोदित कलाकार घडवले. त्यांच्या निधनाने मराठी भावगीत आणि सुगम संगीत क्षेत्रातील एक सुवर्णपान इतिहासजमा झाल्याची भावना कलाकार आणि चाहत्यांकडून व्यक्त केली जात आहे.