अभिनेता टायगर श्रॉफवर गोळीबार झाल्याची घटना मुंबईतील जुहू परिसरात घडल्याची माहिती समोर आली आहे. जुहू परिसरातील पुष्पा पार्क मैदानावर टायगर श्रॉफ फुटबॉल खेळण्यासाठी गेला असताना गोळीबार झाल्याची माहिती मिळत आहे. या घटनेनंतर मुंबई पोलिसांनी महत्वाची माहिती दिली आहे. टायगर श्रॉफ सुरक्षित असून, त्याला गोळी लागल्याने कोणतीही दुखापत झालेली नाही, असे मुंबई पोलिसांनी स्पष्ट केले आहे.

मुंबईतील जुहू पोलिस ठाण्याच्या हद्दीत ही गोळीबाराची घटना घडल्याची माहिती पोलिसांनी दिली आहे. या प्रकरणाचा पुढील तपास सुरू असून गोळीबार नेमका कोणाकडून आणि कोणत्या कारणातून झाला, याबाबत अधिक माहिती अद्याप समोर आलेली नाही.

मुंबई पोलिसांची 12 पथके गोळीबार करणाऱ्याच्या शोधासाठी रवाना झालीय. तर या घटनेत रिक्षा चालक हा गंभीर जखमी झालाय. फुटबॉल मॅच खेळून घरी जात असताना टायगर श्रॉफवर गोळीबार झाल्याचे सांगितले जात आहे.

टायगर श्रॉफच्या गाडीवर गोळीबाराच्या वृत्तावरून काँग्रेसचा सरकारवर निशाणा

अभिनेता टायगर श्रॉफच्या गाडीवर गोळीबार झाल्याच्या वृत्ताने मुंबईतील कायदा-सुव्यवस्थेचा प्रश्न पुन्हा ऐरणीवर आला आहे. मुंबईत नेमकं चाललंय तरी काय, असा संतप्त सवाल काँग्रेस प्रवक्ते सचिन सावंत यांनी उपस्थित केला आहे. बाबा सिद्दीकी यांची हत्या, अभिनेता सलमान खानच्या घरावर झालेला गोळीबार, तसेच अनेक अभिनेते आणि निर्मात्यांना मिळणाऱ्या धमक्यांचा दाखला देत सचिन सावंत यांनी राज्य सरकारवर टीका केली आहे. मुंबईतील कायदा-सुव्यवस्था कोलमडल्याचा आरोप करत त्यांनी मुख्यमंत्री पूर्णपणे अपयशी ठरल्याचा दावा केला आहे. ‘महाराष्ट्राचा बिहार झाला’ असं म्हणण्याची वेळ आली होती, मात्र आता तर ‘बिहार बरा’ असं म्हणण्याची वेळ आल्याची बोचरी टीकाही सचिन सावंत यांनी केली आहे. मुंबईला गुन्हेगारांच्या दहशतीत ढकलणाऱ्या सरकारचा जाहीर निषेध, असं म्हणत त्यांनी आपल्या ट्विटमधून सरकारवर निशाणा साधला आहे.