संजय गडदे, साम टिव्ही प्रतिनिधी

Tiger Shroff Firing Case: अभिनेता टायगर श्रॉफच्या कारवर जुहू येथे झालेल्या गोळीबार प्रकरणात तपास यंत्रणांनी आपला मोर्चा कथित सूत्रधार अनिल पंडितकडे वळवला आहे. या कटामागे अनिल पंडितचा हात असल्याचा संशय असून, त्याला पोलिसांकडून मोस्ट वॉन्टेड आरोपी घोषित करण्यात आल्याची माहिती समोर आली आहे. अनिल पंडितचा कुख्यात लॉरेन्स बिश्नोई गँगशी संबंध असल्याचाही तपास यंत्रणांना संशय आहे. तो अमेरिकेतील कॅलिफोर्निया येथून गुन्हेगारी कारवायांचे सूत्रसंचालन करत असल्याचा अंदाज व्यक्त केला जात आहे.

१८ ऑक्टोबर २०२६ रोजी टायगर श्रॉफच्या कारवर गोळीबार झाल्यानंतर मुंबई पोलिसांनी तपासाची वेग वाढवला. या प्रकरणातील आरोपींनी आपली ओळख लपवण्यासाठी बनावट आधार कार्ड आणि अन्य कागदपत्रांचा वापर केल्याची माहिती तपासातून समोर आली आहे. पोलिसांची दिशाभूल करण्यासाठी काही आरोपींनी टक्कल करून आपला चेहरामोहराही बदलण्याचा प्रयत्न केल्याचे सांगितले जात आहे.

परदेशातून आरोपींना सूचना दिल्याचा संशय

अनिल पंडित हा मूळचा हरियाणातील पानिपत येथील रहिवासी असल्याची माहिती आहे. तो २०२३ मध्ये बेकायदेशीर मार्गाने परदेशात गेल्याचा आरोप आहे. त्यानंतर सोशल मीडिया आणि ‘Jangi App’ या ॲपच्या माध्यमातून तो गुन्हेगारी कारवायांमध्ये सहभागी असल्याचा संशय तपास यंत्रणांना आहे. टायगर श्रॉफच्या कारवर गोळीबार झाला, त्या वेळीही त्याने अमेरिकेतून आरोपींना सूचना दिल्याचा संशय व्यक्त केला जात आहे. या दाव्यांची पुष्टी तपासातून होणे आवश्यक आहे.

३४ ते ३५ हजार रुपयांचे आमिष

या गोळीबारासाठी आरोपींना अंदाजे ३४ हजार ते ३५ हजार रुपये देण्याचे आमिष दाखवण्यात आल्याची माहिती समोर आली आहे. हल्ल्यानंतर नेपाळमार्गे परदेशात पाठवून नोकरी मिळवून देण्याचे आश्वासनही देण्यात आल्याचा आरोप आहे. त्यामुळे या प्रकरणात केवळ गोळीबार करणाऱ्यांचा नव्हे, तर त्यांना आर्थिक मदत, आश्रय किंवा परदेशात पळून जाण्यासाठी मदत करणाऱ्या व्यक्तींचाही शोध घेतला जात आहे.

खंडणी आणि गोळीबाराचेही गुन्हे

अनिल पंडितविरोधात हरियाणा आणि दिल्लीमध्ये खंडणी तसेच गोळीबाराशी संबंधित अनेक गुन्हे दाखल असल्याची माहिती आहे. टायगर श्रॉफ गोळीबार प्रकरणात त्याची नेमकी भूमिका काय होती, त्याने आरोपींना सूचना दिल्या होत्या का आणि या घटनेमागे लॉरेन्स बिश्नोई गँगचा प्रत्यक्ष सहभाग आहे का, या बाबींचा तपास महत्त्वाचा ठरणार आहे.

अनिल पंडित सध्या परदेशात असल्याचा संशय असल्याने त्याला शोधून ताब्यात घेण्यासाठी पोलिसांकडून प्रयत्न सुरू असल्याचे सांगितले जात आहे. मात्र, त्याच्या अटकेची स्थिती, आंतरराष्ट्रीय स्तरावरील कारवाई आणि कथित गँगशी असलेल्या संबंधांबाबत अधिकृत पुष्टी मिळणे आवश्यक आहे.टायगर श्रॉफ गोळीबार प्रकरणात आरोपींना नेमके कोणी निर्देश दिले, हल्ल्यामागील उद्देश काय होता आणि या कटाचे धागेदोरे कुठपर्यंत पोहोचतात, हे पुढील तपासातून स्पष्ट होणार आहे.