Vikram Gokhale Passed Away: ज्येष्ठ अभिनेते विक्रम गोखले यांचं निधन झालं आहे. वयाच्या ७७ वर्षी त्यांनी अखेरचा श्वास घेतला. पुण्यातील दिनानाथ मंगेशकर रुग्णालयात त्यांनी आज (शनिवारी) अखेरचा श्वास घेतला. विक्रम गोखले (Vikram Gokhale)  यांच्यावर गेल्या १५ दिवसांपासून हॉस्पिटलमध्ये उपचार सुरू होते. त्यांच्या निधनाने सिनेसृष्टीवर शोककळा पसरली आहे. अशात मराठमोळा अभिनेता सुबोध भावे याने दिवंगत विक्रम गोखले यांच्या आठवणींना उजाळा दिला आहे. आपल्या आयुष्यात पाहिलेलं पहिलं नाटक विक्रम गोखले यांचं होतं असं सुबोध याने सामटीव्हीशी बोलताना सांगितलं. (Subodh Bhave Latest News)

विक्रम गोखलेंच्या निधनाबाबत अभिनेता सुबोध भावे (Subodh Bhave) म्हणाला, खऱ्या अर्थाने चिरतरुण अभिनेते होते. माझ्या आयुष्यात पहिलं पाहिलेलं नाटक मी पाहिलं होतं. त्यांच काम बघून असं वाटलं होतं की काय अफाट ताकदीचे अभिनेते आहेत हे. त्यांचं स्टेजवरचं वावरणं असेल, त्यांचं बोलण असेल अशा अनेक त्याच्या गोष्टी माझ्या स्मरणात आहे. डॉ. लागू यांच्यानंतर जर अभिनायाचं तंत्र बदलत गेलं त्यातला मोठ टप्पा हे विक्रम गोखले होते. कळत-नकळत आमच्यावर त्यांचे संस्कार आहेत. ते अतिशय नैसर्गिक अभिनय करायचे. ते शरीररुपाने जरी गेले असले तरी त्यांच्या कामाने ते आपल्यातच असतील असं सुबोध भावे म्हणाला आहे.