Jhalak Dikhhla Jaa 10 | मुंबई : टीव्ही इंडस्ट्रीत अनेक नवीन शो प्रसारित होत असतात. त्यातील प्रत्येक शोची वेगळी शैली असते. काही शो प्रेक्षकांच्या मनात घर करून जातात तर काही शो प्रेक्षकांची मने जिंकण्यास अयशस्वी होतात. असाच एक प्रसिद्ध शो लवकरच प्रेक्षकांच्या भेटीला पुन्हा येणार आहे. या शोचे अतापर्यंत ९ सीझन प्रसारित झाले असून, प्रत्येक सीझन सुपरहिट झाला आहे. हा प्रसिद्ध शो म्हणजे सेलिब्रिटी रियालिटी डान्स शो 'झलक दिखला जा'(Jhalak Dikhhla Jaa). तब्बल ५ वर्षांनतर प्रेक्षकांच्या आग्रहास्तव पुन्हा या शोचा १० वा सीझन लवकरच प्रसारित होणार आहे.

'झलक दिखला जा' हा शो सर्वात जुना असून याची सुरुवात २००६ पासून झाली होती. या शोची घोषणा केल्यापासून निर्माते या शोचे जोरदार प्रोमोशन करत आहेत. या शोमध्ये अनेक सेलिब्रिटी कलाकार दिसणार असून मराठी चित्रपटसृष्टीची लाडकी चंद्रा म्हणजेच अमृता खानविलकर देखील या शोमध्ये मराठमोळा जलवा दाखवताना दिसणार आहे. अमृता खानविलकर(Amruta Khanvilkar) याआधी 'नच्च बलिये' या डान्स शोमध्ये विजेती झाली होती. विशेष म्हणजे अमृताने या शोसाठी एक खास प्रोमो शूट केला असून, त्यात नृत्य अप्सरा माधुरी दीक्षितसोबत जुगलबंदी करताना दिसली आहे. या दोघींचा हा प्रोमो व्हिडीओ सोशल मीडियावर तुफान व्हायरल होत आहे.

'झलक दिखला जा'च्या १० व्या सीझनमध्ये निया शर्मा, धीरज धूपर, शिल्पा शिंदे, पारस कालनावत, अमृता खानविलकर, नीती टेलर आणि गश्मीर महाजनी यासारखे कलाकार आपला नृत्याविष्कार सादर करताना दिसणार आहेत. या शोची चाहते आतुरतेने वाट पाहत आहेत. या शोचा आणखी एक प्रोमो रिलीज झाला असून अभिनेता गश्मीर महाजनीसोबत बॉलिवूडची नृत्यांगणा नोरा फतेही आपल्या खास अदा दाखवताना दिसली. 'झलक दिखला जा'चा १०वा सीझन ३ सप्टेंबरपासून शनिवार-रविवारी रात्री ८ वाजता कॅलर्स वाहिनीवर प्रसारित होणार आहे.