Monika Bhadoriya About Tarak Mehta Ka Ooltah Chashmah: तारक मेहता का उल्टा चष्मा हा शो अनेक दिवसांपासून वादात आहे. यापूर्वी मिसेस सोधी यांची भूमिका साकारणाऱ्या जेनिफर बन्सीवालने (Jennifer Mistry) असित मोदी, सोहेल रमाणी आणि जतिन बजाज यांच्यावर लैंगिक छळाचे आरोप केले होते. आता या शोबाबत अभिनेत्री मोनिका भदोरियानेही (Monika Bhadoriya) अनेक खुलासे केले आहेत.

मोनिकाने या शोमध्ये दयाबेनची भूमिका करणारी अभिनेत्री दिशा वाकानीने तारक मेहता का सोडले याचा खुलासा केला आहे. तसेच शोमधील मारहाणीबाबतही तिने धक्कादायक खुलासा केला आहे.

"सोहेल रमानी दिशा वकानीसोबत गैरवर्तन करायचा"

तारक मेहता का उल्टा चष्मामध्ये बावरीची भूमिका करणारी अभिनेत्री मोनिका भदौरियाने अलीकडेच एका मुलाखतीत या शोबद्दल अनेक खुलासे केले. या शोदरम्यान कलाकारांसोबत झालेल्या गैरवर्तनाचा खुलासा तिने केला आहे. सोहेल रमानी दिशा वकानीसोबत गैरवर्तन करायचा असा धक्कादायक खुलासा मोनिका भदौरियाने केला आहे.

कदाचित याच कारणामुळे दिशा वाकानी बऱ्याच दिवसांपासून शोपासून दूर आहे असे देखील ती म्हणाली. मोनिकाने सांगितले की कोणीतरी तुम्हाला चांगले पैसे देतंय आणि सतत फोन करून परत बोलवतंय, परंतु तुम्ही परत येऊ इच्छित नाही. यामागे हे नाही तर आणखी कारण काय असू शकतं.

सेटवरील मारहाणीबाबत केला खुलासा

अभिनेत्रीने सांगितले की, सोहेल काही वेळा इतका वाईट वागायचा की हाणामारीपर्यंत मजल जायची. तिने सांगितले की एक अभिनेता होता. त्याला त्याच्या आईसाठी औषधे पाठवावी लागल्यामुळे एक दिवस त्याला सेटवर पोहोचायला उशीर झाला. यानंतर सोहेलने त्याच्यावर आरडाओरड करण्यास सुरुवात केली. त्याने त्याच्यावर हात देखील उचलला. त्यानंतर सेटवर बराच गदारोळ झाला. मोनिकाने त्या अभिनेत्याचे नाव सांगण्यास नकार दिला. (Latest Entertainment News)

वादांनी घेरला गेलाय शो

प्रेक्षकांमध्ये प्रचंड लोकप्रिय असलेला तारक मेहता का उल्टा चष्मा हा शो गेल्या अनेक दिवसांपासून सतत चुकीच्या कारणांमुळे चर्चेत आहे. या शोबाबत अनेक धक्कादायक गोष्टी समोर येत आहेत. लैंगिक छळाच्या आरोपाशिवाय कलाकारांना फी न देण्यावरूनही यापूर्वी वाद झाल्याचा प्रकार समोर आला होता. (Latest Marathi News)