मुंबई - कोरोनाकाळापासून सोनू सूद (Sonu Sood) हा अनेक लोकांसाठी देवदूत बनला आहे. गेली दोन वर्षे त्याने ज्या प्रकारे लोकांना मदत केली त्यामुळे त्याचे सर्वत्र कौतुक होत आहे. अलीकडेच सोनूने पुन्हा एकदा मानवतेचे उदाहरण जागा समोर मांडले. पंजाबमधील (Punjab) मोगा जिल्ह्यातील कोटकपुरा बायपासजवळ एक रस्ता अपघात झाला. दोन वाहनांच्या धडकेत एक व्यक्ती गंभीररीत्या जखमी झाला होता. त्याला स्वतः सोनू सूदने आपल्या मांडीवर घेऊन रुग्णालयात (Hospital) दाखल केले.

सोनू सूदच्या या कृतीचा व्हिडिओ सध्या सोशल मीडियावर तुफान व्हायरल होत असल्याचे दिसून येत आहे. ही घटना मंगळवारी रात्री उशिरा घडली असल्याची माहिती समोर आली आहे. अपघातानंतर काही वेळातच सोनू सूद तेथून जात होता. अपघात पाहून तो स्वत:ला थांबवू शकला नाही आणि गाडी थांबवून जखमी व्यक्तीच्या मदतीसाठी पोहोचला. त्या व्यक्तीची प्रकृती स्थिर असल्याचे सांगण्यात येत आहे. सोनू सूदच्या या उत्कृष्ट कामाचं चाहते प्रचंड कौतुक करत आहेत.