मुंबई : सध्या सोनाली कुलकर्णी (Sonali Kulkarni) अनेक चित्रपटातून तसेच डान्स शो मधून प्रेक्षकांच्यासमोर येत आहे. ती गेल्या काही दिवसांपूर्वी अख्ख्या महाराष्ट्रात तमाशा घालणारा चित्रपट म्हणजेच 'तमाशा लाईव्ह' (Tamasha Live) चित्रपटातून ती प्रेक्षकांच्या समोर आली होती. तिच्यासोबत पुष्कर जोगही (Pushkar Jog) चित्रपटात मुख्य भूमिकेत होता. याआधी त्यांनी 'ती आणि ती', 'तमाशा लाईव्ह' या चित्रपटात होते. मराठी मनोरंजन विश्वात सध्या अनेक दर्जेदार चित्रपट प्रेक्षकांच्या भेटीला येत आहेत.

अनेक वेगवेगळ्या जॉनरच्या चित्रपटांच्या घोषणेचा सध्या सपाटा चालू आहे. 'माझा होशील ना' फेम विराजस कुलकर्णीने (Virajas Kulkarani) या चित्रपटाच्या माध्यमातून दिग्दर्शन क्षेत्रात पदार्पण करीत असून विराजसच्या जोडीला दिग्दर्शक जीत अशोक (Jeet Ashok) ही आहे. चित्रपटाची निर्मिती आनंद पंडित, रुपा पंडित आणि पुष्कर जोग यांनी केली असून चित्रपटाचे सह निर्माते वैशल शाह आहेत.

चित्रपटात मुख्य भूमिकेत अभिनय क्षेत्रात निपूण असलेले कलाकार दिसणार आहेत. पुष्कर जोग, सोनाली कुलकर्णी, आशय कुलकर्णी दिसणार असून 'व्हिक्टोरिया' चित्रपटाच्या माध्यमातून हिरा सोहल चित्रपटसृष्टीत पदार्पण करीत आहे.

चित्रपटाच्या संपूर्ण टीमने आपल्या सोशल मीडिया अकाऊंटवरुन चित्रपटाचे टीझर शेअर केले आहे. शेअर केलेल्या टीझरमध्ये 'व्हिक्टोरियाचे रहस्य उलगडणार' ही टॅगलाईन असून चित्रपट १६ डिसेंबरपासून सिनेमागृहात प्रेक्षकांच्या भेटीला येणार आहे. 'व्हिक्टोरिया' सिनेमाचे शूटिंग काही दिवसांपूर्वीच स्कॉटलंडमध्ये पूर्ण झाले आहे. थरारपट असणाऱ्या चित्रपटाची माहिती विराजसने खास पोस्ट शेअर करत दिली आहे. या पोस्टमध्ये विराजस म्हणतो, "It's Wrap For व्हिक्टोरिया! थंडी, पाऊस आणि रक्तांच्या धारांमधून आमची debut horror film तुमच्यापर्यंत पोहोचायला एक पाऊल पुढे आली आहे."

Edited By- Chetan Bodke