Rowdy Bhati: उत्कृष्ट संवाद आणि अभिनयाने सोशल मीडियावर आपली ओळख निर्माण करणाऱ्या रावडी भाटी उर्फ ​​रोहित भाटीचा सोमवारी पहाटे रस्ता अपघातात मृत्यू झाला. बीटा-2 पोलीस ठाण्याच्या हद्दीतील चुहारपूर गावातील रस्त्याजवळून त्याची भरधाव कार अनियंत्रित होऊन झाडावर आदळली. या अपघातात कारमधील अन्य दोन प्रवासी गंभीर जखमी झाले आहेत.

अपघाताची माहिती मिळताच रोहितच्या चाहत्यांनी सोशल मीडियावर त्याच्या अपघाती निधनाचा शोक व्यक्त केला. बुलंदशहरात त्याच्यावर अंत्यसंस्कार करण्यात आले. यावेळी त्याचे चाहते मोठ्या प्रमाणात उपस्थित होते.

बुलंदशहरातील सिकंदराबादचा रहिवासी असलेला रोहित भाटी सोशल मीडियावर रावडी भाटी या नावाने प्रसिद्ध होता. रावडी नोएडामध्ये राहत होता. रविवारी रात्री तो मित्रांसह नोएडाहून घरी परतत होता. मंगळवारी पहाटे ३ वाजता रावडी भाटी त्याच्या दोन मित्रांसह स्विफ्ट कारमधून जात होता. त्याची कार अनियंत्रित होऊन चुहारपूर अंडरपासजवळ झाडावर आदळली.

बीटा-2 पोलीस स्टेशन प्रभारी अनिल राजपूत यांनी सांगितले की, माहिती मिळताच पोलीस घटनास्थळी दाखल झाले. त्यांनी गंभीर जखमींना तातडीने जिम्स रुग्णालयात दाखल केले. रावडी ड्रायव्हिंग सीटवर बसला होता. त्याच्या डोक्याला गंभीर दुखापत झाली होती. रुग्णालयात रावडीचा उपचारादरम्यान मृत्यू झाला असून त्याचे दोन मित्र मनोज आणि आतिश हे देखील कारमध्ये होते, त्यांची प्रकृती सध्या चिंताजनक आहे.

रावडी भाटीचे इन्स्टाग्रामवर नऊ लाखांहून अधिक फॉलोअर्स आहेत. त्याच्या चाहत्यांनी अनेक खातीही तयार केली आहेत. त्याच्या अभिनयाचे, संवादांचे आणि गाण्यांचे अनेक व्हिडिओज युट्युबवरही आहेत. त्याच्या निधनानंतर सोशल मीडियावर अनेक व्हिडिओ शेअर करण्यात आले.