अक्षय बडवे

Abhijeet Bhattacharya : बॉलीवूडचे प्रसिद्ध गायक अभिजीत भट्टाचार्य हा त्याच्या वादग्रस्त विधानामुळे वादाच्या भोवऱ्यात अडकला आहेत. काही दिवसांपूर्वी अभिजीत भट्टाचार्य याने महात्मा गांधी आणि जेष्ठ संगीतकार आर.डी बर्मन यांची एकमेकांशी तुलना करत, वादास्पद वक्तव्य केल्यामुळे त्याच्या विरोधात पुण्यातील पोलीस ठाण्यात तक्रार नोंदवण्यात आली आहे.

काही दिवसांपूर्वी अभिजीत भट्टाचार्य याने 'भारत देश आधीच अस्तित्वात होता पण पाकिस्तान देश तयार करण्यात आला आहे. त्यामुळे महात्मा गांधी हे पाकिस्तानचे राष्ट्रपिता आहेत' असे वादास्पद विधान केल्याचा आरोप तक्रारीत नमूद केला आहे. या अपमानास्पद विधानानंतर, सोशल मिडीयावर तीव्र प्रतिक्रिया उमटल्या जिथे लोकांनी त्याच्या वक्तव्याचा निषेध केला आहे.

ही तक्रार सामाजिक कार्यकर्ते मनीष देशपांडे यांनी ॲड.असीम सरोदे,ॲड.श्रीया आवले, ॲड. रमेश तारू, बाळकृष्ण निढाळकर यांच्या सहकार्याने केली आहे. अभिजित भट्टाचार्य याने चुकीचे वक्तव्य करून कलुषित राजकारण करीत असल्याचा आरोपही मनीष देशपांडे यांनी केला आहे.

गायक अभिजीत भट्टाचार्यने भारतीय संविधानाच्या कलम १९ (१) (अ) मधील भाषण आणि अभिव्यक्ती स्वातंत्र्याचा गैरवापर केल्याचा आरोपही मनीष यांनी केला आहे. तसेच या तक्रारीबाबत पोलिसांनी कोणतीच कारवाई केली नाही तर न्यायालयात हा मुद्दा उभा करण्यात येईल असा इशारा देखील देशपांडे यांनी केला आहे.