क्रुझवरील अमलीपदार्थांच्या पार्टीप्रकरणी अटकेत असलेला आर्यन खान सध्या आर्थर रोड तुरुंगात आहे. बुधवारी कार्डिलिया क्रूझ प्रकरणात अटकेत असलेल्या आर्यन खानला विशेष एनडीपीएस न्यायालयाचे व्हि व्हि पाटील न्यायमूर्तींनी जामीन नाकारला आहे. दरम्यान आर्यन खानच्या वकिलांनी आता उच्च न्यायालयात धाव घेतली आहे. यादरम्यान आर्यन खानला भेटण्यासाठी शाहरुख खान आज आर्थर रोड तुरुंगात पोहोचला आहे.

सकाळी ९.१५ च्या दरम्यान शाहरुख खानआर्थर रोड तुरुंगात पोहोचला होता. या दोघांमध्ये २० मिनिट चर्चा झाली. करोना काळात जेल बंद असल्याने नातेवाईकांना कैद्यांना भेटण्याची परवानगी नव्हती. पण परिस्थिती सुधारत असल्याने निर्बंध शिथील करण्यात आले आहे. नातेवाईकांना आता कैद्यांना भेटण्याची परवानगी देण्यात आली आहे. यानंतर शाहरुख खान आर्थर रोड तुरुंगात पोहोचला. यावेळी त्याच्यासोबत सुरक्षारक्षक उपस्थित होते. २ ऑक्टोबरला आर्यन खानला अटक करण्यात आली असून त्यानंतर पहिल्यांदाच शाहरुख खान आपला मुलगा आर्यन खानला भेटला.

Edited By - Shivani Tichkule