मुंबई : कॉमेडियन राजू श्रीवास्तव(Raju Srivastava) गेल्या २१ दिवसांपासून दिल्लीतील एम्स रुग्णालयात(AIMS Hospital) उपचार घेत आहे. राजू श्रीवास्तवची प्रकृती गेल्या ३ दिवसांपासून स्थिर असून, त्यात काहीही बदल झालेला नसला, तरी तो लवकरच शुद्धीवर येईल, असा विश्वास राजूचे कुटुंबीय आणि डॉक्टरांना आहे. परंतु, राजू श्रीवास्तव अजूनही व्हेंटिलेटरवर आहे.

मीडिया रिपोर्ट्सनुसार, राजूच्या श्रीवास्तवच्या जवळच्या नातेवाईकाने सांगितले की, त्याच्या प्रकृतीत पूर्वीच्या तुलनेत सुधारणा झाली आहे. परंतु तो अजूनही ४० टक्के ऑक्सिजन आणि व्हेंटिलेटर सपोर्टवर आहे. गेल्या ३६ तासांपासून त्याच्या प्रकृतीत कोणताही फरक पडलेला नाही.

राजू श्रीवास्तवच्या शारीरिक हालचाली वाढल्या आहेत, पण तरीही तो शुद्धीवर आलेला नाही. मात्र, डॉक्टर त्याच्या प्रकृतीत सुधारणा होत असल्याचे सांगत आहेत. राजूच्या भावाने दिलेल्या माहितीनुसार, राजू श्रीवास्तवला दररोज द्रवस्वरुपात आहार दिला जात असून, त्याला नळीद्वारे दूध आण फळांचा रस दिला जात आहे.

१० ऑगस्ट रोजी राजू श्रीवास्तवला जीममध्ये ट्रेलमिलवर चालताना हृदयविकाराचा झटका आला होता. त्यानंतर राजूला दिल्लीतील एम्समध्ये दाखल करण्यात आले होते. एम्समध्ये दाखल केल्यानंतर राजू श्रीवास्तवची अँजिओप्लास्टी करण्यात आली, मात्र त्यानंतरही त्याच्या प्रकृतीत कोणतीही सुधारणा झाली नाही. राजू श्रीवास्तवच्या मेंदूने काम करणे बंद केले असून, त्याला लाईफ सपोर्टवर ठेवण्यात आले आहे. काही दिवसांपूर्वी राजू श्रीवास्तवच्या हातापायांची हालचाल झाली होती. परंतु अद्यापही राजू शुद्धीवर आला नाही.