Sreelekha Mitra: कोलकाता येथे विद्यार्थ्यांच्या आंदोलनात सहभागी झाल्यानंतर टॉलीवूड अभिनेत्री श्रीलेखा मित्रा नव्या वादाच्या भोवऱ्यात सापडली आहे. आंदोलनादरम्यान पंतप्रधान नरेंद्र मोदी यांचे आक्षेपार्ह व्यंगचित्र असलेले पोस्टर हातात धरल्याचा आरोप करत तिच्याविरोधात विविध पोलीस ठाण्यांत तक्रारी दाखल करण्यात आल्या आहेत. मात्र, पंतप्रधानांचा अपमान करण्याचा कोणताही हेतू नसल्याचे स्पष्ट करत श्रीलेखा मित्रा यांनी या आरोपांचे खंडन केले आहे.

भाजप नेत्या केया घोष यांनी आनंदपूर पोलीस ठाण्यात श्रीलेखा मित्राविरोधात तक्रार दाखल केली आहे. तसेच बिधाननगर सायबर क्राईम पोलीस ठाण्यासह इतर काही जिल्ह्यांमध्येही अतिरिक्त तक्रारी दाखल झाल्याची माहिती समोर आली आहे.

तक्रारीनुसार, 24 जुलै रोजी सियालदह ते धर्मतळा दरम्यान विद्यार्थ्यांनी काढलेल्या मोर्चात श्रीलेखा मित्रा सहभागी झाली होती. यावेळी तिने पंतप्रधान नरेंद्र मोदी यांचे आक्षेपार्ह व्यंगचित्र असलेले पोस्टर सार्वजनिकरीत्या प्रदर्शित केल्याचा आरोप तिच्यावर करण्यात आला आहे. तक्रारीत संविधानाने शांततापूर्ण आंदोलनाचा अधिकार दिला असला तरी सार्वजनिक बदनामी, अपमान किंवा समाजात तेढ निर्माण करणारे कृत्य स्वीकारार्ह नसल्याचे नमूद करण्यात आले आहे.

दरम्यान, पोलिसांनी दाखल केलेल्या तक्रारी नंतर यावर प्रतिक्रिया देताना श्रीलेखा मित्रा म्हणाल्या, त्या दिवशी त्यांनी वाचण्यासाठी वापरणारा चष्मा आणला नव्हता. "माझ्याकडे फक्त गॉगल होता. पोलिसांचा लाठीचार्ज सुरू असल्याने गडबडीत पोस्टरवरील चित्र नीट पाहण्याची संधीच मिळाली नाही," असे त्या म्हणाल्या.

मात्र, त्यांच्या या स्पष्टीकरणानंतरही भाजप नेत्या केया घोष यांनी कठोर कारवाईची मागणी कायम ठेवली आहे. पंतप्रधानांविषयी आक्षेपार्ह चित्रण केल्याचा आरोप गंभीर असल्याचे सांगत त्यांनी श्रीलेखा मित्रा यांच्यावर कायदेशीर कारवाई करून अटक करण्याची मागणी केली आहे.