Shiv Thakare Supported MNS: 'बिग बॉस मराठी २'चा विजेता शिव ठाकरे सध्या दिवसेंदिवस चाहत्यांमध्ये कमालीचा चर्चेत आहे. लवकरच बिग बॉसच्या हिंदीच्या १६व्या सिझनचा ग्रँड फिनाले मोठ्या दणक्यात पार पडणार आहे. मराठी बिग बॉस प्रमाणे हिंदी बिग बॉसमध्ये एका हिऱ्याप्रमाणे शिव सध्या सर्वत्र चमकत आहे. 'बिग बॉस १६'ची ट्रॉफी कोण नेणार याचे उत्तर अवघ्या काही दिवसांतच आपल्याला मिळणार आहे. ‘बिग बॉस मराठी’चा विजेता शिव ठाकरेदेखील फिनालेमध्ये पोहोचला आहे. शिवला महाराष्ट्रातून चांगलाच प्रतिसाद मिळत आहे.

शिव ठाकरेसाठी अनेक कलाकारांसह आता काही राजकीय नेतेही पाठिंब्याच्या पोस्ट टाकत आहेत. मराठी बिग बॉसचे होस्ट व दिग्दर्शक महेश मांजरेकर यांनीही शिवसाठी पोस्ट केली होती. तो बेस्ट असल्याचं त्यात त्यांनी म्हटलं होतं. त्यानंतर खासदार नवनीत राणा यांनीही व्हिडीओ शेअर करत चाहत्यांना शिवला वोट देण्याचं आवाहन केलं होतं. आता मनसेकडूनही शिव ठाकरेला पाठिंबा मिळाला आहे.

मनसे नेते अमेय खोपकर यांनी सोशल मीडियावर पोस्ट करत शिवला पाठिंबा दर्शवला आहे. तसेच त्यांनी शिवला ग्रँड फिनालेसाठी शुभेच्छाही दिल्या आहेत. मनसे नेते अमेय खोपकर पोस्ट करत म्हणतात, “आमच्या सर्वांचा अभिमान, महाराष्ट्राची शान शिव ठाकरे ‘बिग बॉस हिंदी’च्या ग्रँड फिनालेमध्ये पोहोचला आहे. अंतिम फेरीसाठी शुभेच्छा”, असं अमेय खोपकर यांनी म्हटलं आहे.

दरम्यान, 'बिग बॉस १६'हा शो गेल्या वर्षी ऑक्टोबर महिन्यापासून हा शो सुरू आहे. प्रेक्षकांचा शोला मिळणारा प्रतिसाद पाहून याचा कालावधी वाढवण्यात आला होता. येत्या रविवारी म्हणजेच १२ फेब्रुवारीला या शोचा ग्रँड फिनाले मोठ्या दणक्यात होणार आहे.