मनोरंजन विश्वातून दु:खद बातमी समोर आली आहे. प्रसिद्ध मराठी अभिनेत्याच्या आईचे निधन झाले आहे. मराठी मालिकांमधून घराघरात पोहचलेला अभिनेता प्रसाद जवादेच्या आईचे दुःखद निधन झाले. वयाच्या 65 वर्षी त्यांनी अखेरचा श्वास घेतला आहे. प्रसादची आई प्रज्ञा जवादे काही वर्षांपासून कर्करोगाशी झुंज देत होत्या. मात्र काल (28 डिसेंबर 2025) ला त्यांनी अखेरचा श्वास घेतला.

प्रसाद जवादेची बायको आणि प्रज्ञा जवादेची सून अभिनेत्री अमृता देशमुखने इन्स्टाग्रामवर एक भावुक पोस्ट शेअर करून ही माहिती दिली आहे. तिने लिहिलं की, "कळवण्यास अत्यंत दुःख होत आहे की, आज, २८ डिसेंबर २०२५ रोजी, त्यांचे दुःखद निधन झाले आहे. कर्करोगासारख्या गंभीर आजाराशी त्यांनी अपार धैर्य, आणि सकारात्मकतेने लढा दिला. त्या प्रेमळ, शांत आणि कुटुंबाला एकत्र ठेवणाऱ्या व्यक्तिमत्त्वाच्या होत्या. त्यांची आठवण सदैव आमच्या हृदयात राहील. मम्मी आम्हा सर्वांना तुमची खूप आठवण येतेय"

'झी मराठी' पुरस्कार सोहळ्यात प्रसादच्या आईला कॅन्सर असल्याचे समजले. प्रसादचे आईसोबतचे नाते खूप खास होते. या कठीण काळात तो आईसोबत खंबीरपणे उभा होता. त्याच्या आईची इच्छा होती की, प्रसादने मालिकांमध्ये काम करावे. तेव्हा प्रसाद 'पारू' मालिका करत होता. प्रसादने आपल्या अभिनयाने प्रेक्षकांच्या मनात घर केले आहे.

वर्कफ्रंट

प्रसाद जवादे आणि अमृता देशमुख हे मराठी मनोरंजन सृष्टीत क्यूट कपल आहे. दोघे कायम एकमेकांना पाठिंबा देताना दिसतात. दोघांनी आजवर अनेक मालिकांमध्ये काम केले आहे. प्रसाद 'पारू' सोबतच 'कन्यादान', 'माझिया प्रियाला प्रीत कळेना', 'कुलस्वामिनी' अशा अनेक मालिकांमध्ये झळकला आहे.