Jacqueline Fernandez Moves Court For Travel Permission: सुकेश चंद्रशेखर प्रकरणामुळे अभिनेत्री जॅकलिन फर्नांडिस ईडीच्या रडारवर आहे. या प्रकरणाच्या चौकशी संदर्भात तिला परदेशात जाण्यापासून रोखण्यात आलेलं आहे. या प्रकरणात तिने दिल्लीच्या एका न्यायालयात अर्ज दाखल केला आहे. अबू धाबीमध्ये पार पडणाऱ्या आयफा अवॉर्ड्समध्ये (IIFA Awards) जॅकलिनला हजेरी लावायची आहे आणि यासाठी 15 दिवस परदेश दौऱ्यासाठी परवानगी मागितली आहे.

मनी लाँड्रिंग प्रकरणात अडकलीय जॅकलिन;

तब्बल 200 कोटींच्या मनी लाँड्रिंग प्रकरणात जॅकलिन फर्नांडिसचे नाव समोर आले होते, त्यानंतर ईडीने या प्रकरणाचा तपास करत काही दिवसांपूर्वीच तिची मालमत्ता जप्त केली होती. याशिवाय जॅकलिनविरोधात लुक आऊट सर्क्युलर जारी करून तिच्या परदेश प्रवासावर बंदी घालण्यात आली होती. आता जॅकलिन फर्नांडिसला अबुधाबी, फ्रान्स आणि नेपाळच्या 15 दिवसांच्या दौऱ्यावर जायचे आहे, त्यामुळे त्यासाठी तिने न्यायालयात अर्ज दाखल केला आहे.

गेल्या वर्षी डिसेंबर महिन्यात जॅकलिन परदेशात जात असताना तिला मुंबई विमानतळावरून ताब्यात घेण्यात आले होते. जॅकलिनला ईडीच्या चौकशीनंतर घरी जाण्याची परवानगी दिली असली तरी परवानगीशिवाय ती देश सोडू शकत नाही, असे तिला सांगण्यात आलेले आहे.

काही दिवसांपूर्वीच कोटींची मालमत्ता जप्त;

काही दिवसांपूर्वी ईडीने जॅकलिन फर्नांडिसच्या घरावर छापा टाकला होता. या छाप्यात ईडीने जॅकलिनची 7.27 कोटी रुपयांची संपत्ती जप्त केली होती. या प्रकरणी जॅकलिन फर्नांडिसची ईडीने अनेकवेळा चौकशी करण्यात आली आहे. ईडीनुसार, जॅकलिनला सुकेश चंद्रशेखर यांच्याकडून खूप महागड्या भेटवस्तू मिळाल्या होत्या. ईडीनुसार, जॅकलिनने चौकशीदरम्यान याची कबुलीही दिली होती. सुकेशने एका चित्रपटासंदर्भात तिच्याशी संपर्क साधला होता, असेही जॅकलिनने चौकशीदरम्यान सांगितले आहे. जॅकलीनने दावा केला होता की, सुकेश चंद्रशेखरने आपली ओळख एका चॅनलचे मालक म्हणून करून दिली होती.