Parmesh Mali News: देशभरात नोकरी लावून देतो, पैशे द्या, असं आमिष देणाऱ्या व्यक्तींचा सुळसुळाट झाला आहे. अशा व्यक्तींकडून पैसे घेऊन कामे केली जात नाहीत. अशा पद्धतीने आर्थिक फसवणूक केल्याच्या अनेक घटना आतापर्यंत उघडकीस आल्या आहेत. या व्यक्तींच्या बोलण्याला सामान्य नागरिक बळी पडतात. आता कलाकार मंडळीही बळी पडू लागले आहेत. याचेच एक उदाहरण समोर आले आहे. आर्थिक फसवणुकीचा असाच एक प्रकार एकच वादा 'फेम' गायक परमेश माळी याच्यासोबत देखील झाला आहे. (Latest Marathi News)

परमेश माळीने भावाच्या नोकरीसाठी एकाला २५ हजार रुपये दिले. अनेक दिवसांनंतरही परमेशचे काम झाले नाही. त्यामुळे परमेशला स्वत:ची आर्थिक फसवणूक झाल्याचे लक्षात आले. त्यानंतर परमेशने सोशल मीडियावर पोस्ट लिहून फसवणूक करणाऱ्याच्या विरोधात संताप व्यक्त केला आहे .

परमेश माळीने फेसबुकवर पोस्ट करत म्हटलं की, 'नमस्कार! नागरिकांनो सावधान, कल्पेश जाधव नावाचा एक व्यक्ती आहे. तुम्हाला पहिल्यांदा कॉल करणार. तुम्हाला नावाने हाक मारणार. त्यानंतर आपल्या व्यवसायाबद्दल बोलत राहणार. त्यामुळे आपल्याला वाटतं की कोणीतरी आपल्या जवळचाच आहे. त्यानंतर सांगणार की, मी रेल्वेमध्ये नोकरीला लावतो, त्यानंतर कागदपत्रे व्हाट्सअप करण्यास सांगतो. व्हाट्सअप केल्यानंतर तो ऑनलाइन पेमेंट करायला सांगतो, पेमेंट आला की फोन बंद करतो'. (Singer Parmesh Mali Latest News)

'मला आता समजला आहे की, या व्यक्तीने खूप लोकांची फसवणूक केली आहे. आज मीही त्याला बळी पडलो. मला माझ्या भावाला नोकरीला लावायचं होतं,म्हणून मीही 25 हजार रुपये त्याला पाठवले आणि त्याने फोन बंद केला, अशी माहिती परमेश माळीने दिली.

'त्यामुळे अशा लोकांपासून सावध राहा आणि पोलीस बांधवांना एक विनंती करतो की लवकरात लवकर या व्यक्तीवर कारवाई करा, नाहीतर हा अनेक गोरगरिबांना लुटू शकतो, असेही परमेशने पुढे सांगितले.

कोण आहे परमेश माळी?

परमेश माळी प्रसिद्ध गायक आहे. परमेश आगरी कोळी गीते गातो. परमेश माळीचा ऑर्केस्ट्रा फेमस आहे. परमेशने गायलेलं 'एकच वादा, राजू दादा', हे गाणं प्रचंड गाजलं.