मुंबई: बॉलिवूड अभिनेत्री दीपिका पदुकोणने (Deepika Padukone) शाहरुख खानसोबत 'ओम शांती ओम' या चित्रपटाद्वारे तिच्या करिअरची सुरुवात केली होती. हा चित्रपट बॉक्स ऑफिसवर सुपरहिट ठरला. त्यामुळे शाहरुख(shahrukh khan) आणि दीपिकाची जोडी चाहत्यांच्या पसंतीस उतरली. त्यानंतर या जोडीने एकत्र 'हॅपी न्यू इअर', 'चेन्नई एक्स्प्रेस' अशा सुपरहिट चित्रपटांमध्ये एकत्र काम केले. आता पुन्हा ही जोडी एकत्रित रुपेरी पडद्यावर दिसणार आहे. ही जोडी 'पठान' या आगामी चित्रपटात एकत्र काम करणार आहेच, पण दीपिका पदुकोणही शाहरुख खानच्या 'जवान' या चित्रपटातही दिसणार आहे.

एका वृत्तपत्राच्या माहितीनुसार, शाहरुख खान आणि 'जवान'या चित्रपटाचे दिग्दर्शक अॅटली (अरुण) कुमार हे (Atlee Kumar) दीपिकाला या चित्रपटात घेण्यास उत्सुक आहेत. दीपिकाने या चित्रपटात छोटी पण, महत्त्वाची भूमिका साकारण्यास होकार दिला आहे. मात्र तिने अद्याप अधिकृतपणे या माहितीला दुजोरा दिलेला नाही. असे म्हटले जात आहे की, शाहरुख आणि अॅटलीने दीपिकाची हैदराबादमध्ये भेट घेतली होती, जिथे ती सुपरस्टार प्रभाससोबत 'प्रोजेक्ट के' या चित्रपटाचे चित्रीकरण करत होती.

दीपिका पदुकोण ही रणबीर कपूर आणि आलिया भट्टच्या 'ब्रम्हास्त्र'या चित्रपटात कॅमिओ करणार आहे. दीपिकाच्या चाहत्यांना या चित्रपटाच्या ट्रेलरमध्ये दीपिकाची झलक दिसली होती. दीपिका तिच्या कॅरिअरच्या शिखरावर आहे. ती सध्या 'पठान' आणि 'प्रोजेक्ट के' या चित्रपटांचे चित्रीकरण करत आहे. याचबरोबर तिच्या 'द इंटर्न', 'फाइटर' आणि 'महाभारत' या चित्रपटांचे चित्रीकरणही लवकरच सुरू होणार आहे.