Ira Khan Wedding:

बॉलिवूडचा (Bollywood) 'मिस्टर परफेक्शनिस्ट' म्हणजेच अभिनेता आमिर खानची (Aamir Khan) मुलगी आयरा खान (Ira Khan) 3 जानेवारीला विवाहबंधनात अडकणार आहे. आयरा खान (Ira Khan) तिचा बॉयफ्रेंड नुपूर शिखरेसोबत (Nupur Shikhare) लग्न करणार आहे. आयरा आणि नुपूर महाराष्ट्रीय पद्धतीने विवाहबंधनात अडकणार आहे. दोघांच्याही घरी लग्नाची जोरदार तयारी सुरू आहे. आयराच्या लग्नानिमित्त आमिर खान आणि रीना दत्ता यांचे मुंबईतील घर फुलांनी सजवण्यात आलं आहे. तसंच विद्युत रोशनाई करण्यात आली आहे. त्यांच्या घराचे फोटो आणि व्हिडीओ सध्या सोशल मीडियावर व्हायरल होत आहेत.

आमिर खान आणि रीना दत्ता यांच्या मुंबईतील घराचा व्हिडीओ सध्या सोशल मीडियावर व्हायरल होत आहे. ज्यामध्ये दिसत आहे की दोघांचे देखील घर फुलांनी आणि दिव्यांनी सजवण्यात आले आहे. आमिर खानच्या घराचे दोन मजले परी लाइट्सने सुंदरपणे सजवण्यात आले आहेत. तर रीना दत्ता यांचे घर देखील फुलांनी सजवण्यात आले आहे आणि घराला सुंदर लाईटिंग करण्यात आली आहे. काही दिवसांपूर्वी आयरा आणि नुपूरच्या कुटुंबामध्ये लग्नाआधीच्या विधींना सुरुवात झाली. त्याचे व्हिडीओ आणि फोटो आपण पाहिले आहेत.

आयरा तिच्या अधिकृत इन्स्टाग्राम अकाऊंटवर तिच्या प्री-वेडिंग फंक्शनची झलक शेअर करत आहे. नुपूरच्या घरी केळवणाच्या कार्यक्रमाचे आयोजन करण्यात आले होते. या कार्यक्रमाला दोघांच्याही कुटुंबातील सदस्यांनी हजेरी लावली. या कार्यक्रमाच्या फोटोंमध्ये आमिर खान दिसला नव्हता. पण त्याची एक्स वाइफ किरण राव आणि त्यांचा मुलगा आझाद दिसला होता. या कार्यक्रमात अभिनेत्री मिथिला पालकर देखील आली होती.

आयरा खान आणि फिटनेस ट्रेनर नुपूर शिखरे गेल्या अनेक वर्षांपासून एकमेकांना डेट करत आहेत. मागच्या वर्षी दोघांचा साखरपुडा झाला होता. नुपूरने सप्टेंबरमध्ये आयराला एका गेम इव्हेंटमध्ये गुडघ्यावर बसून तिच्या बोटामध्ये अंगठी घालून प्रपोज केले होते. तिने इन्स्टाग्रामवर प्रपोजलचा व्हिडिओ शेअर केला होता. आता 2024 च्या पहिल्या आठवड्यामध्ये हे कपल विवाहबंधनात अडकणार आहे. 3 जानेवारीला लग्नानंतर हे कपल मुंबईत एका ग्रँड रिसेप्शनचे आयोजन करणार आहेत. इंडिया टुडेच्या वृत्तानुसार, रिसेप्शन 10 जानेवारीनंतर आयोजित केले जाण्याची शक्यता आहे आणि त्यात अनेक बॉलिवूड सेलिब्रिटी सहभागी होणार आहेत.