Article 370 Movie:

बॉलिवूड (Bollywood) अभिनेत्री यामी गौतम लवकरच नव्या चित्रपटाच्या माध्यमातून प्रेक्षकांच्या भेटीला येणार आहे. यामी गौतमचा 'आर्टिकल 370' या चित्रपटाची सध्या सगळीकडे चर्चा आहे. नुकताच यामी गौतमीच्या या चित्रपटाचा टीझर (Article 370 Teaser) रिलीज झाला. टीझरमध्ये यामी गौतमचा बिनधास्त आणि निडर अवतार सर्वांना पाहायला मिळत आहे.

या चित्रपटाच्या टीझरला प्रेक्षकांकडून खूप चांगली पसंती मिळाली असून ते आता चित्रपटाच्या रिलीज होण्याची वाट पाहत आहे. या चित्रपटामध्ये प्रसिद्ध मराठमोळा अभिनेता देखील मुख्य भूमिकेत असणार आहे. टीझरमध्ये वैभव तत्ववादीची (Vaibhav Tatwawadi) झलक आपल्याला पाहायला मिळाली.

२०२३ मध्ये अप्रतिम कंटेट असलेले चित्रपट दिल्यानंतर आता वैभव तत्ववादी 'आर्टिकल 370' या नव्या चित्रपटाच्या माध्यमातून २०२४ मध्ये प्रेक्षकांच्या भेटीला येणार आहे. वैभव तत्ववादी या चित्रपटामध्ये यामी गौतमसोबत राजकीय अ‍ॅक्शन ड्रामा 'आर्टिकल 370' मध्ये दमदार भूमिका साकारताना दिसणार आहे. या चित्रपटाचे संपूर्ण शूटिंग काश्मिरमध्ये करण्यात आले आहे. हा चित्रपट येत्या २३ फेब्रुवारीला प्रदर्शित होणार आहे.

'आर्टिकल 370' बद्दल बोलताना वैभव तत्ववादीने सांगितले की, 'आदित्य जांभळे दिग्दर्शित या विलक्षण चित्रपटाचा भाग होण्यासाठी मी खूप उत्सुक आहे. अप्रतिम कलाकारांसोबत काम करण्याची संधी मला मिळाली. काश्मीरच्या नयनरम्य ठिकाणी शूटिंग करणे ही एक उत्तम गोष्ट होती. हे एक व्यस्त शूट होते. पण चित्रपट पाहिल्यानंतर मला वाटते की सर्व मेहनत सार्थकी ठरेल.'

'आर्टिकल 370' या चित्रपटामध्ये यामी गौतम मुख्य भूमिकेत आहे. यामी या चित्रपटामध्ये भारतीय गुप्तचर संस्थेच्या अधिकाऱ्याच्या भूमिकेत दिसत आहे. त्याचबरोबर 'द फॅमिली मॅन' या चित्रपटातून प्रसिद्धी मिळालेली अभिनेत्री प्रियमणीही महत्त्वाच्या भूमिकेत दिसणार आहे. या चित्रपटाच्या टीझरमध्ये काश्मीरमधील दगडफेकीच्या काही मूळ क्लिपही पाहायला मिळणार आहेत.

राष्ट्रीय चित्रपट पुरस्कार विजेते दिग्दर्शक आदित्य सुहास जांभळे यांच्या दिग्दर्शनाखाली हा चित्रपट तयार करण्यात आला आहे. 'उरी-द सर्जिकल स्ट्राइक'या चित्रपटाचा दिग्दर्शक आणि यामी गौतमचा पती आदित्य धर लोकेश धर आणि ज्योती देशपांडे यांनी या चित्रपटाच्या निर्मितीची धुरा सांभाळली आहे. यामी गौतमचा हा चित्रपट 23 फेब्रुवारी 2024 ला प्रदर्शित होणार आहे.