प्रेक्षक गेल्या अनेक दिवसांपासून ज्या क्षणाची आतुरतेने वाट पाहत होते, अखेर तो क्षण आला. २८ जुलैला म्हणजेच काल ‘बिग बॉस मराठी’च्या ५ व्या सीझनचा ग्रँड प्रीमियर दणक्यात पार पडला. यावेळी प्रेक्षकांना या सीझनमध्ये कोणकोणते स्पर्धक दिसणार याची प्रचंड उत्सुकता होती. शेवटी त्यावरील ही पडदा शेवटी उठला आहे. एकूण १६ स्पर्धकांनी घरात एन्ट्री घेतली असून अफलातून परफॉर्मन्स सादर करत कार्यक्रमाची शान वाढवली.

‘बिग बॉस मराठी ५’च्या घरात सोशल मीडिया एन्फ्ल्यून्सरसह अनेक टेलिव्हिजन सेलिब्रिटी शोमध्ये दिसणार आहेत. यंदाच्या सीझनमध्ये वर्षा उसगांवकर, निखिल दामले, कोकण हार्टेड गर्ल म्हणजेच अंकिता प्रभू वालावलकर, पंढरीनाथ कांबळे, योगिता चव्हाण, जान्हवी किल्लेकर, अभिजित सावंत, घन: श्याम दरवडे, इरिना रुडाकोवा, निक्की तांबोळी, वैभव चव्हाण, अरबाज पटेल, आर्या जाधव, पुरुषोत्तमदादा पाटील, धनंजय पोवार आणि गुलिगत धोका फेम सूरज चव्हाण.... असे स्पर्धक बिग बॉसच्या प्रेक्षकांना पहायला मिळणार आहेत.

बिग बॉस मराठीचा हा सीझन सर्वांसाठीच खास असणार आहे. कारण, हा सीझन इतर सीझनपेक्षा फार वेगळा सीझन आहे. या सीझनमध्ये स्पर्धकांना पैसे देऊन वस्तू खरेदी कराव्या लागणार आहेत. त्यांना पैसे नाही तर बिग बॉस करन्सीच्या माध्यमातून त्या वस्तू खरेदी कराव्या लागणार आहेत. खरोखरंच हा सीझन इतर सीझन्सपेक्षा फार वेगळा असणार आहे. यंदाच्या सीझनमध्ये सोशल मिडिया एन्फ्लूएंसर, अनेक मराठमोळे सेलिब्रिटी आणि काही बॉलिवूड सेलिब्रिटीही आपल्याला सीझनमध्ये खेळताना दिसणार आहेत.

हा खेळ १०० दिवस सुरू राहणार आहेत. या १०० दिवसांमध्ये घरातल्या स्पर्धकांमध्ये रूसवे- फुगवे, मैत्री, प्रेम आणि राडा अशा अनेक वेगवेगळ्या गोष्टी पाहायला मिळणार आहेत. तुम्हाला ‘बिग बॉस मराठी ५’ दररोज रात्री ९ वाजता कलर्स मराठीवर पाहायला मिळेल.