मुंबई - टीव्ही इंडस्ट्रीला आणखी एक मोठा धक्का बसला आहे. भाभी जी घर पर है फेम अभिनेता दिपेश भान (Deepesh Bhan) यांचे निधन झाले आहे. शोमध्ये दीपेश मलखान सिंगच्या भूमिकेत दिसला होता. दिपेश त्याच्या कॉमेडीसाठी ओळखला जातो. त्यांच्या आकस्मिक निधनाची बातमी ऐकून सर्वांनाच धक्का बसला आहे. दीपेश भानच्या निधनाने टीव्ही इंडस्ट्रीत हळहळ व्यक्त केली जात आहे.

हे देखील पाहा -

मिळालेल्या माहितीनुसार, शनिवारी सकाळी तो क्रिकेट खेळत असताना अचानक खाली पडला. त्यानंतर त्याला तातडीने रुग्णालयात दाखल करण्यात आले. मात्र रुग्णालयात पोहोचल्यावर डॉक्टरांनी दीपेशला मृत घोषित केले. त्याच्या मागे बायको आणि मुलगा आहे 2019 मध्ये दिल्ली येथे त्याचं लग्न झालं होतं.

11 मे 1981 रोजी जन्मलेल्या दीपेशने वयाच्या अवघ्या 41 व्या वर्षी हे जग सोडले. दिपेशने दिल्लीतून पदवी घेतल्यानंतर थेट नॅशनल स्कूल ऑफ ड्रामामध्ये प्रवेश घेतला. येथून अभिनयाचा अभ्यासक्रम पूर्ण केल्यानंतर 2005 मध्ये दीपेश मुंबईत आला. शोमध्ये मुलींसोबत फ्लर्ट करणाऱ्या दीपेश भानचे खरे लग्न मे 2019 मध्ये दिल्लीत झाले होते. गेल्या वर्षी 14 जानेवारी 2021 रोजी दिपेश मुलाचा पिता झाला.