मनोरंजनविश्वातील लोकप्रिय जोडी अशोक सराफ आणि निवेदिता सराफ कायमच चर्चेत असतात. सध्या सर्वत्र गणेशोत्सव या सणाची धामधूम सुरू आहे. अनेक सेलिब्रिटी बाप्पााच्या दर्शनासाठी भेटी देत आहेत. नुकतंच अशोक सराफ आणि निवेदिता सराफ यांनी अभिनेत्री सायली संजीवच्या बाप्पाचे दर्शन घेतले आहे.

अशोक सराफ आणि निवेदिता सराफ यांनी सायली संजीवच्या घरी बाप्पाचे दर्शन घेतले आहे. सोशल मीडियावर निवेदिता सराफ यांनी सायलीसोबतचा सुंदर फोटो पोस्ट केला आहे. फोटो पोस्ट करत निवेदिता सराफ यांनी,'लेकीकडचं गणपती दर्शन' असं कॅप्शन दिलं आहे. सोशल मीडियावर निवेदिता सराफ यांच्या कॅप्शनने सर्वांचेच लक्ष वेधून घेतले आहे.

निवेदिता सराफ यांच्या या पोस्टला सोशल मीडियावर चाहत्यांनी लाईक्स करत अनेक प्रतिक्रिया दिल्या आहेत. अशोक सराफ आणि निवेदिता सराफ हे सायली संजीवला त्यांची मुलगीच मानतात. निवेदिता यांच्या पोस्टवर नेटकऱ्यांनी, "तुमच्यासारखीच दिसते, तर आणखी खरंच तुमची मुलगी वाटते.., लाडाची लेक" अश्या प्रतिक्रिया दिल्या आहेत.

अशोक सराफ आणि सायली संजीव यांच नातं काय?

अभिनेत्री सायली संजीव ही अशोक सराफ आणि निवेदिता सराफ यांना आई- वडील मानते. 'काहे दिया परदेस' या मालिकेत अशोक सराफ हे सायलीला त्यांची लेक मानू लागले. सुरूवातीला 'काहे दिया परदेस' मालिकेचा प्रोमो पाहून सायली संजीव ही निवेदिता सराफ यांच्यासारखी दिसते असे प्रोमो पाहून सर्वच बोलू लागले. दरम्यान सगळीकडे सायली ही तुमची मुलगी आहे अशी चर्चा रंगली.