मुंबई : बॉलिवूडचा दबंग खान सलमान खानने(Salman Khan) २६ ऑगस्ट रोजी सिनेसृष्टीत ३४ वर्षे पूर्ण केली आहेत. ३४ वर्षांपूर्वी याच दिवशी सलमान खानचा 'बीवी हो तो ऐसी'(Biwi Ho To Aisi) हा पहिला चित्रपट प्रदर्शित झाला होता. हा चित्रपट बॉक्स ऑफिसवर जरी फ्लॉप झाला असला तरी या चित्रपटाने सलमान खानला बॉलिवूडमध्ये ओळख निर्माण करून दिली. तेव्हापासून आतापर्यंत बॉक्स ऑफिसवर सलमान खानचा दबदबा कायम आहे. आता ३४ वर्षानंतर या खास दिवशी सलमान खानने त्याच्या आगामी चित्रपटाची घोषणा केली आहे.

सलमान खानने त्याच्या अधिकृत इन्स्टाग्राम हॅंडलवर आपल्या नवीन चित्रपटाच्या नावाची घोषणा केली आहे. 'किसी का भाई किसी की जान है' असे त्याच्या आगामी चित्रपटाचे नाव आहे. सलमान खानने त्याच्या अधिकृत इन्स्टाग्राम हॅंडलवर एक व्हिडीओ शेअर करत या बाबतची माहिती दिली आहे. या व्हिडीओमध्ये सलमानने चित्रपटातील त्याचा नवा लूक प्रेक्षकांसोबत शेअर केला आहे. सलमान खानने या चित्रपटाची घोषणा करून त्याच्या चाहत्यांना सरप्राईज दिले आहे. सलमानचे चाहते त्याच्या या नव्या लूकचे कौतुकही करत आहेत. सलमान खानने त्याचा आगामी चित्रपट 'कभी ईद कभी दिवाळी' चे नाव बदलून 'किसी का भाई किसी की जान' असे केले असल्याचा अंदाज बांधला जात आहे. मात्र याबाबत अद्याप कोणतीही पुष्टी झालेली नाही.

सलमान खानच्या वर्कफ्रंटबदल बोलयचे झाले तर, सलमान खान 'टायगर ३' या चित्रपटामध्ये कतरिना कैफसोबत दिसणार आहे. त्याचबरोबर सलमानचा 'किसी का भाई किसी की जान' हा चित्रपटही लवकरच प्रेक्षकांच्या भेटीला येणार आहे. सलमान खान शेवटचा 'अँटीम - द फायनल ट्रुथ' या चित्रपटामध्ये दिसला होता. या चित्रपटांशिवाय सलमान खान रिअ‍ॅलिटी शो 'बिग बॉस सीझन १६' मुळेही चर्चेत आहे.