Actress Breast Cancer: बॉलिवूड आणि छोट्या पडद्यावरील ज्येष्ठ अभिनेत्री शगुफ्ता अली यांनी त्यांच्या आयुष्यातील सर्वात कठीण काळाबद्दल प्रथमच मनमोकळेपणाने भाष्य केले आहे. दिलीप कुमार, नूतन, गोविंदा, करिश्मा कपूर आणि माधुरी दीक्षित यांसारख्या दिग्गज कलाकारांसोबत काम केलेल्या शगुफ्ता यांनी ब्रेस्ट कॅन्सरशी लढा, आर्थिक संकट आणि करिअर टिकवण्यासाठी केलेला संघर्षाबद्दल भाष्य केले.

सिद्धार्थ कन्नन यांना दिलेल्या मुलाखतीत शगुफ्ता अली यांनी सांगितले की, त्यांना तिसऱ्या स्टेजच्या ब्रेस्ट कॅन्सरचे निदान झाले होते. मात्र ही गोष्ट त्यांनी अनेक वर्षे कोणालाही सांगितली नाही. यामागील कारण सांगताना त्या म्हणाल्या की, जर इंडस्ट्रीला त्यांच्या आजाराची माहिती मिळाली असती, तर त्यांना काम मिळणे बंद झाले असते, अशी भीती त्यांच्या मनात होती.

त्या म्हणाल्या, 'मला स्पष्टपणे सांगण्यात आलं होतं की, याबद्दल कुणालाही सांगू नकोस. जर लोकांना ब्रेस्ट कॅन्सरबद्दल कळलं, तर तुला काम मिळणार नाही. त्या भीतीमुळेच मी शांत राहिले आणि कुणालाही याबद्दल सांगितलं नाही.' त्या काळात मनोरंजन क्षेत्रातील वातावरणही अशा गोष्टी स्वीकारण्यास तयार नव्हते.

आजारासोबतच शगुफ्ता अली यांना आर्थिक अडचणींचाही सामना करावा लागला. त्यांनी सांगितले की, घरखर्च आणि उपचारांचा खर्च चालवण्यासाठी त्यांना स्वतःचे दागिने आणि कार विकावी लागली. मात्र, परिस्थिती कितीही कठीण असली तरी त्यांनी आपले घर विकले नाही. आजही गरज पडल्यास त्या ऑटो-रिक्षाने प्रवास करतात. या कठीण काळात अनेक कलाकारांनी त्यांना मदतीचा हात दिला. विशेषतः दिग्दर्शक रोहित शेट्टी आणि अभिनेत्री नीना गुप्ता यांनी आर्थिक मदतीसाठी पुढाकार घेतल्याचे त्यांनी सांगितले. त्यांच्या या सहकार्याबद्दल शगुफ्ता यांनी त्यांचे आभार मानले.

आर्थिक अडचणींवरून होणाऱ्या टीकेलाही त्यांनी सडेतोड उत्तर दिले. त्या म्हणाल्या, 'लोक विचारायचे की माझ्याकडे सेव्हिंग नव्हती का? अर्थातच होती. पण २०१७ पासून सुरू झालेल्या आजारपणात आणि घरखर्चात ती हळूहळू संपली. मी काही अंबानी, टाटा किंवा अदानी नाही. मी एक टेलिव्हिजन अभिनेत्री आहे आणि माझ्या कुटुंबातील एकमेव कमावती सदस्य होते. औषधोपचार, घरखर्च आणि रोजच्या गरजा या सगळ्या त्याच बचतीतून भागवाव्या लागल्या.'