मुंबई: 'बस बाई बस' या कार्यक्रमातून घराघरात पोहोचलेला अभिनेता सुबोध भावे(Subodh Bhave) आता ओटीटी विश्वात पदार्पण करत आहे. लवकरच एका वेगळ्या रूपात तो प्रेक्षकांच्या भेटीला येणार आहे. नाटक, मालिका, चित्रपटात दमदार अभिनय केल्यानंतर पहिल्यादांच अभिनेता सुबोध भावे वेबसीरीजमध्ये दिसणार आहे. याविषयीची माहिती स्वत: सुबोध भावेने सोशल मीडियावर दिली आहे.

सुबोध भावेने त्याच्या इन्स्टाग्राम अकाउंटवर त्याच्या आगामी वेबसीरीजचा ट्रेलर शेअर केला आहे. 'कालसूत्र- प्रथम द्वार मृत्यूदाता'(kalsutra) असे त्याच्या वेबसीरीजचे नाव आहे. जिओ स्टुडिओज् घेऊन येत आहे मराठीतला पहिला थरारक आणि रोमांचकारी अॅक्शन थ्रीलर वेब शो... सुबोध भावे आणि सयाजी शिंदे यांच्या जुगलबंदीची थरारक कथा... ! एक चित्तथरारक माईंड गेम... 'कालसूत्र- प्रथम द्वार मृत्यूदाता' असे भन्नाट कॅप्शन त्याने लिहिले आहे.

'कालसूत्र- प्रथम द्वार मृत्यूदाता' या वेबसीरीजमध्ये सुबोध भावे पोलीस अधिकाऱ्याच्या भूमिकेत दिसणार आहे. रहस्यमय कथा असलेल्या या मराठी वेबसीरीजमध्ये सुबोध भावेसह सयाजी शिंदे, स्वप्नील जोशी, चिन्मय मांडलेकर हे कलाकार झळकणार आहेत. भीमराव मुडे दिग्दर्शित, सुबोध भावे निर्मित या वेबसिरीजची चाहत्यांना प्रचंड उत्सुकता आहे. 'कालसूत्र- प्रथम द्वार मृत्यूदाता' ही वेबसीरीज २०२३ मध्ये प्रेक्षकांच्या भेटीला येणार आहे.