Balasahebancha Raj New Play: मनसे अध्यक्ष राज ठाकरे हे कलाप्रेमी आहेत. राज ठाकरे नेहमीच कलाकारांचे आणि त्यांच्या कामाचे कौतुक करतात. राज ठाकरे यांच्या या प्रेमाविषयी त्यांचे महाराष्ट्र सैनिक देखील जाणून आहेत. म्हणूनच महाराष्ट्र नवनिर्माण सेनेकडून दोन अंकी मराठी नाटकाची निर्मिती करण्यात आली आहे. आता राज ठाकरे आणि बाळासाहेब ठाकरे यांच्यावर आधारित कलाकृती आपल्याला लवकरच पाहायला मिळणार आहे.

महाराष्ट्र नवनिर्माण सेना निर्मित या नाटकाचे नाव 'बाळासाहेबांचा राज' असे आहे. या नाटकाची निर्मिती अनिकेत बंदरकर एंटरटेनमेंटकडून करण्यात आली आहे. तसेच याचे लेखन आणि दिग्दर्शन अनिकेत बंदरकर यांनी केले आहे. बाळासाहेब ठाकरे यांच्या जयंती दिवशी म्हणजे २३ जानेवारीला या नाटकाचा पहिला प्रयोग होणार आहे. मुंबईतील रवींद्र नाट्यमंदिर येथे दुपारी ४:३० वाजता या नाटकाचा शुभारंभाचा प्रयोग रंगणार आहे.

'बाळासाहेबांचा राज' या नाटकाचे पोस्टर प्रदर्शित झाले आहे. हे पोस्टर भगवा रंगात आहे. तसेच बाळासाहेब ठाकरे यांचे प्रतिकृती दाखविण्यात आली आहे. तसेच त्यांच्यासमोर हातात झेंडे घेऊन शिवसैनिक उभे आहेत. बॅकग्राउंडला देखील बाळासाहेबांचा फोटो दाखविण्यात आला आहे. पोस्टरच्या दोन्ही बाजूंना मस्जिद दाखविण्यात आली आहे.

प्रमोद गांधी प्रस्तुत या नाटकाच्या पहिल्या प्रयोगाला राजकीय आणि मनोरंजन क्षेत्रातील अनेक मंडळी उपस्थित राहणार आहेत.