नवरा-बायको म्हटलं की वाद, भांडणं होतच असतात. वादविवाद शिवाय घरपण नसतं. पण वाद टोकाला गेले की, सुखी जोडप्याला नजर लागते. यवतमाळमध्येही क्षुल्लक कारणावरून झालेल्या नवरा बायकोच्या वादाने टोक गाठलं आणि नवऱ्यानं पत्नीचा जीव घेतला. ही घटना शहरातील गाडगे नगर परिसरात घडली.

घरगुती वादातून नवरा बायकोमध्ये कडाक्याचा वाद झाला. हा वाद विकोपाला गेल्याने पतीनेच पत्नीची हत्या केली. शालू अमित शास्त्रकार असे हत्या झालेल्या महिलेचे नाव आहे. तर प्रवीण उर्फ अमित शास्त्रकार असे मारेकरी पतीचे नाव आहे.

आधी पत्नीवर हल्ला नंतर पोलिसांना गेला शरण

अमित आणि पत्नी शालू या दोघांमध्ये घरगुती कारणावरून वाद झाला. हा वाद इतका टोकाला गेला, त्यातून पत्नीची हत्या झाली. पती अमितला राग अनावर झाला आणि त्याने पत्नीवर लोखंडी रॉडने हल्ला चढवला. या हल्यात शालू गंभीरित्या जखमी झाली. त्यानंतर तिला उपचारासाठी रुग्णालयात दाखल केलं, पण उपचारादरम्यान तिचा मृत्यू झाला. दरम्यान घटनेनंतर मारेकरी पती स्वतःहून पोलिसांना शरण गेला. पोलिसांनी मारेकरी अमितला ताब्यात घेतलंय. पोलीस या प्रकरणाचा अधिक तपास करत आहेत.