करवाचौथच्या दिवशी पत्नी आपल्या पतीच्या दीर्घायुष्यासाठी व्रत करते. पण उत्तर प्रदेशातील कौशांबी येथे पत्नीने करवाचौथच्या दिवशीच आपल्या पतीची हत्या केली. पत्नीने दिवसा पतीच्या दीर्घायुष्यासाठी उपवास केला आणि रात्री उशिरा त्याच्या जेवणात विष मिसळून त्याला खायला घातले. त्यामुळे पतीची प्रकृती बिघडली. त्याला तात्काळ रुग्णालयात दाखल करण्यात आले. पण उपचारादरम्यान त्याचा मृत्यू झाला. घटनेनंतर संशयित आरोपी पत्नी पसार झाली होती. काही वेळाने पोलिसांनी तिला ताब्यात घेतले.

दारानगर कडा धाम येथील लाल बहादूर शास्त्री नगरात ही धक्कादायक घटना घडली. ३२ वर्षीय शैलेशचे पत्नी सवितासोबत नेहमी खटके उडायचे. तो नेहमी निराश असायचा. रविवारी करवाचौथच्या दिवशी दोघांमध्ये वाद झाला, असे कुटुंबीयांकडून सांगण्यात आले.

सविताने रात्री उशिरा शैलेशच्या जेवणात विष मिसळून त्याला खायला घातले. काही वेळाने त्याची तब्येत बिघडली. माहिती मिळाल्यानंतर कुटु्ंबीयांनी शैलशला तात्काळ रुग्णालयात नेले. तेथे त्याचा काही वेळाने मृत्यू झाला, अशी माहिती देण्यात आली.

या घटनेची माहिती मिळाल्यानंतर पोलीस (Police) घटनास्थळी पोहोचले. त्यांनी या घटनेचा तपास करण्यास सुरुवात केली आहे. मृताचा लहान भाऊ अखिलेश याने या प्रकरणी पोलिसांत तक्रार दिली आहे. पोलिसांनी मृतदेह विच्छेदनासाठी रुग्णालयात पाठवला आहे. आरोपी पत्नी घटनेनंतर पसार झाली होती. पोलिसांनी काही वेळाने तिला ताब्यात घेतले. तिची चौकशी करण्यात येत आहे, अशीही माहिती आहे.

पोलिसांच्या माहितीनुसार, इस्माइलपूर गावात राहणाऱ्या शैलेशची रविवारी रात्री जेवल्यानंतर अचानक तब्येत बिघडली. त्याला सार्वजनिक आरोग्य केंद्रात नेण्यात आले. तेथे उपचार सुरु असतानाच त्याचा मृत्यू झाला. कुटुंबीयांनी त्याची पत्नी सवितावर आरोप केला आहे. जेवणात विष मिसळल्याचे त्यांचे म्हणणे आहे. त्यानंतर पोलिसांनी सविताला ताब्यात घेतले. तिच्याविरोधात गुन्हा दाखल केला आहे.