उत्तर प्रदेशच्या बुलंदशहरमध्ये एका २८ वर्षीय तरुणीवर चार तरुणांनी गँगरेप केल्याची धक्कादायक घटना घडली होती. ही तरुणी पोलिस ठाण्यात तक्रार दाखल करायला गेली पण पोलिसांनीच तिची अब्रू लुटली. एका पोलिसाने या तरुणीवर दोन दिवस बलात्कार केला आणि दुसऱ्या पोलिसाने आरोपींवर कारवाई करतो असे म्हणत ५० हजार रुपये लुटले असा आरोप पीडित तरुणीने केला. या घटनेनंतर बुलंदशहर पोलिस दलात एकच खळबळ उडाली. या दोन्ही पोलिस उपनिरीक्षकांना निलंबित करण्यात आले आहे.

पीडित तरुणीने सांगितले की, नोव्हेंबर २०२४ मध्ये ४ तरुणांनी माझे अपरहण केले होते. कोल्ड ड्रिंकमध्ये गुंगीचे औषध देत त्यांनी माझ्यावर सामूहिक बलात्कार केला होता. अलीगढ आणि इतर ठिकाणी ४८ दिवस मला ओलीस ठेवत त्यांनी माझ्यावर वारंवार बलात्कार केला आणि जबरदस्ती धर्मांतर करायला लावले होते. आरोपींमधील एकाशी इन्स्टाग्रावरून माझी ओळख झाली होती. तर इतर तिघे जण त्याचे मित्र होते.

आरोपीच्या तावडीतून पळून जाण्यात मी यशस्वी झाली. त्यानंतर मी पोलिस ठाण्यात तक्रार दाखल करण्यासाठी गेली होती. या ठिकाणी एका उपनिरीक्षकाने मला खासगी निवासस्थानी बोलावले. त्याठिकाणी त्याने माझ्यावर दोन दिवस बलात्कार केला. तर दुसऱ्या एका पोलिस अधिकाऱ्याने आरोपीला अटक करण्यासाठी ५० हजार रुपये घेतले.

बुलंदशहरचे एसएसपी दिनेश कुमार यांनी सांगितले की, तरुणीने सुरूवातीला ४ जणांनी सामूहिक बलात्कार केल्याची तक्रार केली होती. या प्रकरणी एका आरोपीला अटक करण्यात आली आहे. तर तरुणीने दोन पोलिस अधिकाऱ्यांवर गंभीर आरोप केले होते. त्या दोघांचे देखील तात्काळ निलंबन करण्यात आले आहे. सध्या या प्रकरणाच्या चौकशीचे आदेश देण्यात आले आहेत. या पोलिस अधिकाऱ्यांची देखील चौकशी केली जात आहे. चौकशीसाठी एक टीम तयार करण्यात आली आहे.