विश्वभूषण लिमये, साम टिव्ही

सोलापूर : सोलापूर जिल्ह्यातील बार्शी तालुक्यातील पाथरी गावात धाडसी चोरीची घटना घडली असून चक्क न्यायाधीशांच्या घरीच चोरट्याने डल्ला मारला आहे. मध्यरात्री १.३० वाजेच्या सुमारास चोरट्यांनी घराच्या किचनच्या दरवाजाचं कुलूप तोडून घरातील ज्वारीच्या कोट्यातून जवळपास २० तोळे सोनं आणि ५ हजार रुपयांची रोकड लंपास केली आहे. या प्रकरणी अज्ञात चोरट्यांविरुद्ध बार्शी ग्रामीण पोलीस ठाण्यात गुन्हा दाखल करण्यात आला आहे. न्यायाधीश हे देवदर्शनासाठी कोल्हापूरला गेले असता ही घटना घडली आहे.

मिळालेल्या माहितीनुसार, पाथरी येथील दिनेश गायकवाड हे सध्या वाशिम तालुक्यातील रिसोड येथे न्यायदंडाधिकारी असून सुट्टीनिमित्ताने ते गावी आले होते. त्यातच, धार्मिक कार्यक्रमनिमित्ताने ते कोल्हापूरला दर्शनासाठी गेले असता, त्यांच्या घरात चोरीची घटना घडली. याबाबत, त्यांच्या आई पद्मिनी मुकुंद गायकवाड यांनी पोलिसांत फिर्याद दिली आहे. त्यानुसार, अज्ञात चोरट्यानं घरातील सोन्याचे दागिने अंदाजे किंमत १२ लाख २३ हजार रुपये आणि ५ हजार रोकड लंपास केल्याचं नमूद करण्यात आलं आहे.

तक्रारीत काय म्हटलं आहे?

आमच्या घरी धार्मिक कार्यक्रम असल्यानं मुलगा, सुन आणि नातवंडे घरी पाथरी येथे आले होते. तसेच मुलगी रेश्मा तिच्या मुलांसह कार्यक्रमासाठी आली असून ती सध्या आमच्याकडेच राहण्यास आहे. धार्मिक कार्यक्रम झाल्यानंतर दिनांक १५ मे रोजी रोजी मुलगा, सुन आणि नातवंडे असं सर्वजण देवदर्शनासाठी कोल्हापूर येथे गेले आहेत. काल दिनांक १६ मे रोजी रात्री १० वाजता मी आणि मुलगी रेश्मा, नातवंडे असे जेवण करून घराच्या हॉलमध्ये झोपलो होतो. हॉल व किचन-बेडरूममध्ये रिकामा पोर्च असल्याने किचनला बाहेरून कुलूप लावून नेहमी झोपतो. काल देखील आम्ही जेवण झाल्यानंतर किचनला बाहेरून कुलूप लावून झोपलो होतो. आज रोजी सकाळी ६ वाजताच्या सुमारास मी झोपेतून उठून हॉलचा दरवाजा उघडण्याचा प्रयत्न केला असता बाहेरून कडी लावल्याचं दिसून आलं. त्यामुळे मी खिडकीतून बाहेर पाहिलं असता किचन रुमचे कुलूप लावलेलं नव्हतं व दरवाजा उघडा दिसला.