Shocking News : एका ४ वर्षीय मुलाने त्याच्या पँटमध्ये शी केली. यामुळे संतापलेल्या त्याच्या आईने मुलाला चमचा गरम करुन त्याचे चटके दिले. मुलाच्या पायांवर आणि पाठीच्या खालच्या भागात जखमांच्या खुणा आढळल्या आहेत. सुरुवातीला मुलाची आई रुग्णालयात खोटे बोलत होती. पण तिच्या सासरच्या मंडळींनी मुलासोबत घडलेली घटना सांगितली. त्यानंतर सत्य समोर आले. ही घटना केरळच्या एका गावात घडली आहे.

मिळालेल्या माहितीनुसार, मुलाने पँटमध्ये शी केल्याने संतापलेल्या महिलेने स्वयंपाकघरात ठेवलेल्या गरम लोखंडी चमच्याने मुलाच्या पाठीवर आणि पायांवर चटके दिले. यामुळे मुलाच्या शरीरावर जखमा झाल्या. बाळ वेदनेने ओरडत राहिले, पण त्याची आई थांबली नाही. शेवटी आपले कृत्य लपवण्यासाठी महिला खोटं बोलली.

शरीरावर चटके दिल्याने मुलाला त्रास होऊ लागला. दुसऱ्या दिवशी त्याला उपचारासाठी रुग्णालयात नेण्यात आले. तेव्हा मुलगा चुकून चुलीवर बसला, तेव्हा त्याचे शरीर भाजले गेले असे महिलेने डॉक्टरांना सांगितले. पण तिच्या सासरच्या मंडळींनी घडलेली घटनेची माहिती डॉक्टरांना दिली. त्यानंतर पोलिसांना बोलवण्यात आले.

गरम लोखंडी चमच्याने मुलाला चटके देत त्याला शारीरिक इजा पोहोचवणाऱ्या त्याच्या आईच्या विरुद्ध पोलिसांनी गुन्हा दाखल केला आहे. पोलिसांनी या महिलेला अटक देखील केली आहे. मुलाच्या आईवर बाल न्याय कायदा आणि भारतीय दंड संहितेच्या विविध कलमांखाली गुन्हे दाखल करण्यात आला आहे. मुलाला वैद्यकीय सेवा दिली जात आहे. त्याची प्रकृती स्थिर आहे. महिलेविरुद्ध कठोर कारवाई केली जावी अशी मागणी मुलाच्या आजी-आजोबांनी केली आहे.