जळगावमध्ये वडील मुलाच्या नात्याला काळिमा फासणारी घटना समोर आली आहे. रिक्षा घेण्यासाठी पैसे देण्यास नकार दिल्याच्या रागातून मुलाने जन्मदात्या पित्याची हत्या केली आहे. सदर घटना जळगावच्या चाळीसगाव शहरातील एम.जी. नगर येथे घडली. भिकन रणा मोरे (वय ६८) असे मृत व्यक्तीचे नाव आहे. याप्रकरणी मृत व्यक्तीच्या पत्नीच्या तक्रारीवरून पोलिसांनी आरोपीला बेड्या ठोकल्या आहेत. या घटनेननंतर परिसरात हळहळ व्यक्त केली जात आहे.

मिळालेल्या माहितीनुसार, भिकन मोरे हे पत्नी सखुबाई व मुलगा कल्पेश यांच्यासह चाळीसगाव शहरातील एम.जी. नगर येथे राहत होते. कल्पेश हा काही दिवसांपासून वडिलांकडे रिक्षा घेण्यासाठी पैशांची मागणी करत होता. मात्र कल्पेशला वडिलांनी पैसे देण्यास नकार दिला. शनिवारी सायंकाळी याच कारणावरून घरात टोकाचा वाद झाला.

वडिलांनी पैसे देण्यास नकार दिल्यानंतर संतापाच्या भरात कल्पेशने काठी व कमरेच्या पट्ट्याने भिकन मोरे यांना मारहाण केली. या मारहाणीत भिकन मोरे गंभीर जखमी झाले. त्यांना तत्काळ रुग्णालयात दाखल करण्यात आले. मात्र रुग्णालयात दाखल करताच डॉक्टरांनी त्यांना उपचारापूर्वी मृत घोषित केले.

घडलेल्या संतापजनक प्रकारानंतर पोलिसांना घटनेची माहिती देण्यात आली. पोलिसांनी घटनास्थळी दाखल होत आरोपी कल्पेश मोरे याला अटक केली. पत्नी सखुबाई मोरे यांच्या फिर्यादीवरून मुलाच्या विरोधात खुनाचा गुन्हा दाखल करण्यात आला आहे. पुढील तपास चाळीसगाव शहर पोलीस करत आहेत.