शुभम देशमुख, भंडारा

भंडारा जिल्ह्यातील मोहाडी तालुक्यातील बेटाळा येथे आज सकाळी एका २५ वर्षीय तरुणाचा छिन्नविच्छिन्न अवस्थेत मृतदेह आढळल्याने संपूर्ण जिल्ह्यात खळबळ उडाली आहे. आकाश शेंडे असे या मृत तरुणाचे नाव असून, ही हत्या प्रेमविवाहाच्या रागातून झाल्याचा प्राथमिक संशय व्यक्त केला जात आहे.

मिळलेल्या माहितीनुसार, आकाश शेंडे याने दीड महिन्यापूर्वी गावातीलच एका मुलीशी आंतरजातीय प्रेमविवाह केला होता. या लग्नाला मुलीच्या कुटुंबाकडून विरोध असल्याची चर्चा गावात होती. आज सकाळी गावाबाहेर आकाशचा मृतदेह अत्यंत विदारक आणि छिन्नविच्छिन्न अवस्थेत आढळून आला.

शरीरावरील जखमांचे स्वरूप पाहता, ही हत्या अत्यंत क्रूरपणे आणि नियोजनबद्ध रितीने केल्याचे दिसून येते.घटनेची माहिती मिळताच मोहाडी पोलिसांनी तातडीने घटनास्थळ गाठून मृतदेह ताब्यात घेतला. पोलिसांनी दिलेल्या प्राथमिक माहितीनुसार मृतदेह उत्तरीय तपासणीसाठी शासकीय रुग्णालयात पाठवण्यात आला आहे.

मृत्यूचे नेमके कारण आणि हत्येसाठी वापरलेले हत्यार शोधण्याचे काम सुरू आहे.आकाशने केलेल्या आंतरजातीय विवाहामुळेच ही हत्या झाली असावी, असा दाट संशय मृताच्या नातेवाईकांनी आणि ग्रामस्थांनी व्यक्त केला आहे.या घटनेनंतर बेटाळा गावात संतापाचे वातावरण असून मोठ्या प्रमाणात पोलीस बंदोबस्त तैनात करण्यात आला आहे.