फैयाज शेख, साम टीव्ही, प्रतिनिधी

Thane Crime News : ठाण्यात एक धक्कादायक घटना घडली आहे. ठाण्याच्या शहापूरमधील एका आश्रमशाळेत अकरावीत शिकणाऱ्या विद्यार्थिनीवर विनयभंग झाल्याचा प्रकार उघडकीस आला आहे. गंभीर बाब म्हणजे पीडित मुलीने आश्रमशाळेच्या मुख्याध्यापकानेच हे कृत्य केल्याचा आरोप केला आहे. या प्रकरणी मुख्याध्यापकावर विनयभंगाचा गुन्हा दाखल करण्यात आला आहे.

शहापूर तालुक्यातील टाकी पठार येथील शासकीय माध्यमिक व उच्च माध्यमिक आश्रमशाळेतील विद्यार्थिनीने तिच्या मुख्याध्यापकावर विनयभंगाचा आरोप केला आहे. या प्रकरणात मुख्याध्यापक प्रभाकर जाधवला पोलिसांनी ताब्यात घेतले आहे. पीडितने आईवडिलांना अत्याचाराबद्दल सांगितले. त्यांनी त्यानंतर लगेच पोलीस स्थानकात जाऊन तक्रार दाखल केली.

पोलिसांनी दिलेल्या माहितीनुसार, पीडित मुलगी सध्या अकरावी इयत्तेत आहे. तिच्यावर १८ जानेवारी रोजी अत्याचार झाला. ती लेझीम खेळून वर्गात परतली होती. तेव्हा तिच्या पाठोपाठ मुख्याध्यापकांनी देखील वर्गात प्रवेश केला. वर्गात कोणी नसल्याचा फायदा उचलून त्यांनी पीडितेवर अत्याचार केला.

झालेल्या प्रकारामुळे पीडित मुलगी घाबरली. तिने सर्वकाही घरी आई आणि वडिलांना सांगितला. पुढे पीडितेच्या पालकांनी किन्हवली पोलीस स्थानक गाठत मुख्याध्यापकाच्या विरोधात विनयभंगाची तक्रार दाखल केली. पुढे पोलिसांनी मुख्याध्यापक जाधवला अटक केली. अटकेनंतर पोलिसांनी या प्रकरणाचा पुढील तपास करायला सुरुवात केली.