विजय पाटील, साम टीव्ही, प्रतिनिधी

Sangli Crime News : सांगलीमध्ये एक धक्कादायक प्रकार घडला आहे. शहरात मोबाईल स्क्रीन गार्डच्या खरेदीवरुन एका तरुणाचा निर्घृण खून करण्यात आला आहे. ही घटना सांगली शहरातील बस स्थानकाजवळील मोबाईल दुकानात ही घटना घडली आहे. पोलिसांनी आरोपीला जेरबंद केल्याची माहिती समोर आली आहे.

पोलिसांनी दिलेल्या माहितीनुसार, सांगलीच्या बस स्थानकाजवळ असलेल्या भैरवनाथ मोबाईल शॉपमधील एका कामगारावर चार तरुणांनी जीवघेणा हल्ला केला. चाकू आणि कोयत्याने वार करत त्यांनी कामगाराची हत्या केली. १०० रुपयांचे मोबाईल स्क्रीन गार्ड ५० रुपयांना न दिल्याच्या रागात ही हत्या झाल्याचे प्राथमिक तपासात उघडकीस आले आहे.

जीवघेण्या हल्ल्यात मृत्यू झालेल्या कामगाराचे नाव विपुल अमृतपुरी गोस्वामी आहे अशी माहिती समोर आली आहे. आज (२६ जानेवारी) सकाळी अकराच्या सुमारास ही घटना घडली आहे. मोबाईल स्क्रीन गार्डची कमी किंमतीत देण्यास नकार दिल्याने चार आरोपींनी या कामगाराचा जीव घेतला. या हल्ल्यानंतर दुकानासमोर बघ्यांची मोठी गर्दी झाली.

या प्रकरणाची माहिती मिळताच पोलीस अधीक्षक संदीप घुगे, अप्पर अधिकक्ष रितू खोकर, उपविभागीय अधिकारी विमला एम यांनी घटनास्थळी भेट दिली. पाहणी केल्यानंतर त्यांनी लगेच तपासाला सुरुवात केली. अवघ्या काही तासात पोलिसांनी आरोपींना अटक केली. या घटनेमुळे सांगली बस स्थानक परिसरात खळबळ उडाली आहे.